Aavarneq akitsuuserneqassanngilaq
Storm Ludvigsen assoralivoq siunnersuuteqarami tuttut tallimat pisarineranni 1.000 koruuninik akiliisitsisoqartalissasoq.
Siunnersuut saqqummiunneqarpoq taamatut akiliisitsisalernissaq pillugu Naalakkersuisut paragraf 37 naapertorlugu apeqquteqarfigineqarmata siunnersuut qanoq isumaqarfigineraat.
- Tuttunut umimmannullu piniarnermi immikkut maannakkorpiaq akiliuteqartitsisalernissamik pilersaaruteqartoqanngilaq, kisianni susassaqarfimmi tassani nalunaarutissatut missingersuutini nutaani taamatut akitsuusiisoqarsinnaanera periarfissiisoqarpoq, aalisarnermut piniarnermullu Naalakkersuisoq Ane Hansen Storm Ludvigsenimut akissummini allappoq.
Naalakkersuisut isumaqarput allaffissornikkut aningaasartuutit isertitanit amerlanerussasut taamatut immikkut akitsuusiisoqassappat.
Storm Ludvigsen taamatut siunnersuuteqarpoq inuussutissarsiutigalugu piniartut illersorniarlugit. Kisitsisit 2011-mi decembarip arfernaneersut takutippaat inuussutissarsiutigalugu piniartut 2.054-usut kiisalu sunngiffimmi aallaaniarnermut allagartallit 4.969-usut.
