Aavariat angallamminnik ikuallattoortut
Aavariat umiatsiaminnik ikuallattoortut Aasiannut qulimiguulimmik S-61-imik ataasinngormat unnukkut apuunneqarput. Marluk uutitersimasut napparsimavimmut unitsinneqarput, allalli marluk umiatsiaq ikuallalermat imaanut pissikkamik ajornerusumik ajoqusersimanngillat. Aasianni Politiit pisortaat, Arne Sandgreen Reimer, KNR-imut oqaluttuarpoq.
Politiit umiatsiap ikuallassimanera pillugu ataasinngormat ualikkut nalunaaqutaq tallimap qeqqanut kalerrinneqarput. Kalerriisoq tassaasimavoq aavariaq alla. Taassuma ajutoorsimasut ilaat marluk ikiortissarsiorlutik 10 kilometerit missaanni pisussimasut naapereerlugit satellitikkut oqarasuaatini atorlugu politiinut kalerriisimavoq.
Aasianni Politiinit ilanngullugu oqaluttuarineqarpoq ikuallanneq angallatip orsernerani tassanngaannarluni aallartissimasoq. Politiit ilimagaat ikuallanneq aallartissimassasoq umiatsiap kiassaataata aalaanit. Orsernerummi nalaani kiassaat ikumasimavoq.
Aasianni Politiit pisortaata, Arne Sandgreen Reimerip, ilanngullugu oqaluttuaraa ikuallanneq ima sukkatigisumik sakkortutigisumillu aallartissimasoq, angutinit aavariartunit umiatsiap qatserutaa allaat atorneqarsinnaasimanani. Aamma VHF radio angallattagoq satellittikkullu oqarasuaat aavariat imminnut annaanniarnerminni tigunngitsoorsimavaat. Taakkua saniatigut umiatsiap gummibådia, qummoroortaatit kalerrisaarutit, umiatsiap VHF-ia ikuallannermi annaaneqarsimapput.
Taamaammat politiinit maanna kaammattuutigineqarpoq umiatsiamik orsernermi atortorissaarutit umiatsiallu motoriiata tamarmik qameqqaarneqartarnissaat.
