Nuuk: Aavariaq ujaarineqartoq
(Allaaserisaq nutarterneqarpoq 06:08:2018 nal. 14:45: Nuummi Politiit KNR-imut aggustip arferngani nalunaaqutaq 14:01 nalunaaruteqarput ujarneqartoq ataasinngornermi ualikkut ataatsip missaani ajunngitsoq nassaarineqartoq, aaqq.)
Nuummi politiit piffissami matumani qulimiguulik S-61 atorlugu Nuup Kangerluani Majualami angummik arfininngormat aavariarluni putsernerani tammartumik ujaasipput.
Taama politiit pingaartuata pisortaa, Julie Bendtsen, KNR-imut ilisimatitsivoq.
AAMMA ATUARUK: Nuuk: Aavariaq ujaarineqartoq ajunngitsoq nassaarineqartoq
Julie Bendtsen naapertorlugu Aasiaat Radioata angut ujarneqartoq vhf radiokkut kingullermik ataasinngornerup unnuaani attaveqaqatigisimavaat, angutilli vhf radiomi batterii sipaarniaramigit suli attavigineqaqqissimanngilaq.
- Oqaatigisimavaa sapinngisani naapertorlugu qullarterniarniarluni, nassaarineqarnissani ajornannginnerussammat. Aamma ikumaartitsiniarluni oqarsimavoq. Taamatullu kavaajani meqquluanik imalik qernertoq ulissimavaa, taamaalilluni ilupaqutaa aappaluartoq ersarinnerussammat. Taamaammat Majualamiittut ikumaartitsisumik takusaqarunik politiinut attaveqaqqunarput, Julie Bendtsen oqarpoq.
Angut ujaarineqartoq ima nassuiarneqarpoq:
- Angut kalaaleq
- 50-it naajartorneranni ukiulik
- Qernertumik kavaajaqartoq meqquluanik imalimmik, aappaluartumik ilupaqutilik
Majualami aavartut allat politiit angummik ujaasinerannut ikiortaasinnaasumik takusaqassagaluarpata takusaqarsimappataluunniit oqarasuaammut 701448-mut attaveqaqqusipput.
