Aavariaq ujaarineqartoq
Angut Qeqertarsuarmiit Nassuttuup tungaanut marlunngornermi aggustip 30-ani aallarpoq, ilaqutaasalu oqarnerat naapertorlugu sapaatip akunnera qaangiuppat angerlartussaangaluarluni.
Politiit angallataat Sisak IV Nassuttooq sinerlugu ippassaq ujaasitinneqarpoq, kinguneqanngitsumik.
Nassuttuup eqqaani piniariat arlallit politiinit naammattoorneqartut immikkut maluginiagaqarsimanngitsut, Thomas Egedalip, Qeqertarsuarmi politiit aqutsisuata oqarpoq.
Timmisartoq Kangilinnguani sakkutooqarfimmeersoq ullaaq manna ujaasitinneqarpoq, aamma kinguneqanngitsumik.
Sisimiuni politiit qulimiguulik atorlugu angummik ujaasineq massakkut ingerlappaat.
Angut ujaarineqartoq angalanermik misilittagaqarluartuuvoq, umiatsiaraa Vitt 500 aquttarfialu aappaluartumik qalipaateqarluni.