Aavaat Nuummut

Inuit Issittormiut siunnersuisoqatigiit Nuummi ataatsimeersualerpata erinarsoqatigiit kalaallit Danmarkimi najugaqartut, Aavaat, aliikkusersuisunut ilaassapput.
Allattoq Jaaku Lyberth
juunip 17-at 2010 06:55

ICCp ataatsimeersuarnerisa sisamassaani erinarsoqatigiit Aavaat tusarnaatitsissapput. ICC Nuummi 1998-imi ataatsimeersuarmat erinarsoqatigiit Aavaat aamma tusarnaartitsipput.

Erinarsoqatigiinni erinarsortut 32-it Nuummut angalanissaannut aningaasanik katersineq imaannaanngissimasoq, ernarsoqatigiinni siulittaasoq Carsten Siegstad oqarpoq.

Namminersortut inuillu ataasiakkaat erinarsoqatigiit angalanissaannut tapiissuteqarsimapput. Danmarkimi Kulturi pillugu aningaasaateqarfik tapiissuteqarpoq, aningaasat sinneri erinarsoqatigiit namminneq katersinermikkut pissarsiaraat, ilaatigut cd-mit 'Qaammarpoq nuna'-mit tuniniaanermi sinneqartoorutit atorneqarlutik.

Erinarsoqatiit Nuummi Hans Egedep oqaluffiani junip ulluisa 30-anni tusarnaarneqarsinnaapput. Tusarnaartitsinermi KNR-TV-kkut aallakaatinneqartussami, erinarsoqatigiit allat aamma tusarnaartitsissapput.

Erinarsoqatigiit Aavaat Belgiami Bruxellesimi inuiattut ullorsiornermut atatillugu tusarnaartitsissapput.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq