Aavaat: Nutaamik cd-liorniarput
Kalaallit erinarsoqatigiit Aavaat sivisuumik pilersaarusioreerlutik nutaamik CD-mik saqqummersitsinialerput.
Allattoq Elisa Isaksen
juunip 27-at 2008 17:09
CD-p imarissavai kalaallisut meerarsiutit nutaanngitsut 22-t.
- Ilisimasavut naapertorlugit kalaallinik erinarsoqatigiinnik meeqqat erinarsuutaannik imalimmik aatsaat CD-liortoqarpoq, erinarsoqatigiinni Aavaakkunni siulittaasoq Carsten Siegstad oqarpoq. Taassuma neriuutigaa CD nutaaq aggustip aallartilaarnerani nunatsinni pisiniarfinni pisiarineqarsinnaalissasoq. Soorluttaaq aggustip aallaqqaataani kalaallit Tivolimi ulloqartinneqarnissaanut piareersinnaanissaa neriuutigineqartoq.
CD nutaaq tunisaanermigut sinneqartoorfiussagaluarpat, sinneqartoorutit nunatsinni meeqqanut tapiissutigineqarnissaat erinarsoqatigiit isumaqatigiissutigisimavaat.
