Aavaat "Nunatsinnut juullimi pilluaqqusinermut" peqataaqqissapput
Erinarsoqatigiit 1998-imi peqataaqqaarput, taamaniillu ukiut tamaasa Aavaat aallakaatitassiamut peqataajuaannarsimallutik. 2001-imi taamaallaat peqataanngillat, juullimi pilluaqqusinermut peqataanngikkallarnissamik erinarsoqatigiinnit kissaateqartoqarmat.
Ukiormannalu juullisiummik nmutaarluinnarmik erinarsussapput, ”Juullissaraasiit eqqissinartoq”. Carsten Siegstadip erinniaralugulu taalliaa, Mads Lumholtimit aaqqissorneqartoq, Mands Lumholtip aamma erinarsoqatigiit siulersuissavai. Juullisiut taanna "Kalaallit Nunaannut juullimi pilluaqqussisoqarnerani" siullerpaamik saqqummiunneqassaaq.
Aallakaatitassiaq tallimanngorpat decembarip 20-iani nal. 20.00 Radiohusitoqqap tusarnaartitsisarfiani, ullumikkut Musikkonservatoriamik taaguuteqartumi, immiunneqassaaq, isissutissallu tamaasa pisiarineqareersimapput. Julie Berthelsen saqqummiisuussaaq.