Aavaat aamma N.I.P.E. suleqatigiinnialerput

aggustip 01-at 2006 07:36

Nipilersortartut erinarsortartulluunniit nalinginnaasumik kattussinnaagaangata kattunneq taakkununnga immaqa nukittorsaataasinnaasarpoq.

Massakkut taama pisoqartoq oqaluttuarisinnaalerparput, tassami kalaallit

Danmarkimi erinarsoqatigiit, Aavaat, Nuummilu erinarsoqatigiit NIPE siunissami suleqatigiinniarlutik isumaqatigiimmata. Erinarsoqatigiit taakku nuannarineqarluartut Kalaallit Københavnimi Illuutaanni katerisimaaqqammerput, suleqatigiinnissamillu isumaqatigiissut tassani pivoq.

Erinarsoqatigiit kalaallisullu erinarsortarnerup pingaaruteqassusiat erinarsoqatigiinnit marlunnit taakkunannga siuarsarniarneqassaaq. Misilittakkatik tunngavigalugit imminnut kaammattoqatigiissapput, isumaqatigiissummullu aamma ilaavoq, erinarsoqatigiit taakku marluk, NIPE aamma Aavaat, imminnut ”aallartitatut”, ambassadøritut, suleqatigiissasut.

Danmarkimi erinarsoqatigiinni Aavaakkunni siulittaasoq, Carsten Siegstad, oqarpoq, suleqatigiinnissartik immikkut pisinnaatitaaffeqalernertut isigigini, ilanngullugulu oqarpoq, erinarsoqatigiittut ilaatigut immaqa kiserliortutut misigisarsimallutik.

Carsten Siegstadip qularinngilluinnarpaa, kalaallit Danmarkimi erinarsoqatigiittarnerat suleqatigiilernermikkut siuarsarneqarlualerumaartoq.