Aavaakkut aatsaat taama nuannarineqartigaat
Kikkut sianertarnersut erinarsoqatigiit Aavaakkut siulittaasuata Carsten Siegstadip oqaluttuaraa:
- Inuinnaat peqatigiiffinneersullu. Ukioq manna danmarki EU-mi siulittaasuusussaagami tassa EU-p ministerrådeqarfianiit attavigineqarpugut erinarsoriaqqulluta. Aamma nunanit allaniit attavigitittarpugut. Budapest-imi Etnografisk Museumimi tassa tusarnaartitsissuugut, nunarsuup kissatsikkiartorneranik ilisimatusarfimmi, taama oqarpoq Carsten Siegstad.
Danmarkip EU-mi ministerrådi ukiumi nutaami qaammatit arfinillit siulittaasuuffigissuaa, tamatumunngalu atatillugu erinarsoqatigiit Aavaakkut illoqarfik Budapestimi Ungarnimiittumi aprilip qeqqani qaaqqusaasimapput erinarsoriaqqullugit.
Erinarsoqatigiit dronning Margrethep qullersatut ukiunik 40-nik nalliuttorsiortigineqarnerani Chriatiansborgslotskirkemi tassa Københavnimiittumi oqaluffimmi erinarsorput. Qanormita ippa nalliuttorsiornermi taama pingaartigisumi peqataalluni?
- Dronninngimut erinarsorluni persuarsiornartorujuuvoq, peroornartorujuulluni naalannartorujuullunilu. Persuarsiutigisaqaapput Aavaakkunniit peroorluni ilumoorsaarluta qaaqqusaagaagatta, sapinngisannguarpullu tamaat tusarnerniarsarisarluta, taama oqarpoq Carsten Siegstad.
Erinarsoqatigiit Aavaakkut nuannarineqarnerminnut peqqutaanerarpaat sumi tamaani saqqumilaarnertik soorlu facebookikkut, Carsten Siegstadip isumaa malillugu, kisianni attavigiuminarnerat kisimi peqqutaanavianngilaq.
- Aqutsisugissaarneq pingaartorujuuvoq. Ukiorpassuarni aqutsisutta Mads Lumholtip iluasaarluni piviusorsiorluni aquttarsimagamitigut. Aamma nipilersornermik Musikkonservatoriemi ilinniarnikuugami, tamanna iluaqutigilluartaqaarput. Peqatigiiffitsinni ataqatigiinneq pingaartittorujuuvarput aqutsisugissaarnerlu, taavalu avataaniit piuminartumit atassuteqarfigineqarsinnaaneq, taama oqarpoq erinarsoqatigiit Aavaakkunni siulittaasoq Carsten Siegstad.
Aavaakkut erinarsoqatigiittut Danmarkimi 1996-imi aallartipput.
Carsten Siegstad ukiut arfineq aappassaanni Aavaakkunni siulittaasuuvoq.
