Aatsitsiviliornissamut innuttaasut paasissutissinneqarusupput
Aluminiumissamut aatsitsiviliortoqassanersoq suli aalajangiiffigineqanngikkaluartoq, Alcoap pilersaarutaa Naalakkersuisuniit isumalluarfigineqarpoq, Aatsitassarsiornermut Naalakkersuisoq Ove Karl Berthelsen oqarpoq nangillunilu:
-Pilersaarut piviusunngortinneqassappat qulaajagassat sukumiisut tamaasa Naalakkersuisoqarfinniit arlalinnit misissuiffigineqarnerat ingerlagallartariaqarpoq.
Alumiuniumissamut aatsitsiviliortoqassanersoq Sisimiuni innuttaasut assigiinngitsunik isumaqarfigaat.
Ove Rosing Olsen oqarpoq, pilersaarut piviusunngortinneqartariaqartoq, Hans Kleistili isumaqarpoq, pilersaarut pillugu suli paasissutissat amerlanerusut pisariaqartut.
- Isumaqaraluarama inissaqarnermut tunngasut Alcoap akissaajaatigiumaarai, kisianni naamik, kommuninngooq namminersortullu akissaajaatigissavaat. Imaappoq: Illoqarfik nutaaq pilersinneqassaaq minnerpaamik - immaqa meerartai ilanngukkaanni - 3000-it sinnerlugit angissusilik. Tamakkua initaartortinnissai kiap isumagissavai, Alcoanngooq isumagissanngilaa, ataatsimiititsinermi taamatut oqaatigineqarpoq, Hans Kleist oqarpoq.
- Aningaasarsiornikkut ineriartorneq unittoorluinnangajassimavoq, annikitsuarannguit kisimik ingerlapput taavalu inuit kipiluttortutut massakkut inissisimalerput. Tassanngaanniit alloriaqqittariaqarpugut, aningaarsarsiornikkut periarfissanik nutaanik annertuunillu tigusisariaqarpugut neriuuteqaqqittariaqaleratta taavalu aamma ineriartortutut inuiaqatigiittut anersaaqarluta inuusariaqaratta, Ove Rosing Olsen oqarpoq.
