Aatsitassat qaqutigoortut EU-mi oqallisigineqarput
Bruxellesimi ataatsimiinnermi, ilaatigut Flemming Knudsen oqalugiartuussaaq. Taanna ilisimaneqartutut Royal Greenlandimi siornatigut pisortaasimavoq, maannalu Hudson Resourcesimi, Nunatsinni aatsitassanik qaqutigoortunik ujaasisuni, siulersuisunut ilaasortaalluni.
Aatsitassat qaqutigoortut Nunatsinni pigineqartut siunissami politikikkut oqallisaallualernissaat amerlaqisut naatsorsuutigaat, Nunattami aatsitassaqarfittut isigineqarnera tamatumuunakkut annerulissammat.
Aatsitassat tamakku annertunersaat Narsap eqqaani Kuannersuarni Killavaanilu nassaassaapput. Aatsitassat qaqutigoortut tamakku teknikkikkut atortorissaarutini assigiinngitsorpassuarni mingutsitsinngitsumik atorneqarsinnaapput, soorlu anorisaatini innaallagissiuutini, seqernup qinngornerinik tigooraassutini, pærini nukimmik atuinikitsuni batteriinilu.
Nunarsuatsinni aatsitassat qaqutigoortut amerlanersaasa Nunatsinniinnissaat ilimagineqarpoq. Nunarsuatsinni aatsitassanik taamaattunik pisariaqartitsineq ukiuni tulliuttuni 50-ini Nunatsinnit matussuserneqarsinnaassasoq ilimagineqarpoq.
Aatsitassanut qaqutigoortunut tunngatillugu Kinap oqaasissaqarnerujussuanik ajornartorsiut taamaalilluni iliuuseqarfigineqarsinnaassaaq, taamalu Nunatta tunisaasa ataatsimut nalinginik marloriaatinngortitsisinnaallutik, Nunarpullu aatsitassanik tamakkuninnga Europamut tuniniaasuni annerpaanngorsinnaasoq, ataatsimiinnermi oqaluuserisassani ilaatigut allassimavoq.
