Aatsitassat pillugit ataatsimeersuarneq ullumikkut aallartilerpoq
Kalaallit Nunaanni suliffeqarfiit sulisullu ukiuni tulliuttuni suliassaat ataatsimeersuarnermi nassuiarniarneqassapput.
Aatsitassarsiorfinni uuliasiorfinnilu sulisut ilinniarsimasut nassuiaassapput, taakkulu Kalaallit Nunaanneersuupput, Norgemeersuullutik, Canadameersuullutik, Savalimmiuneersuullutik Danmarkimeersuullutillu.
Peqataasunut ilaassaaq Qaasuitsup Kommuniani borgmesteri, Jess Svane, Kommune Avannarlermi misissuinermi "Offshore Onshore"-imi, tassa sinerissap avataani nunamilu misissuinernit nalunaarutit siulliit ataatsimeersuarnermi oqalugiaatigissallugit.
Qaasuitsup Kommunia tassaavoq Nunatsinni kommunini siullersaalluni nunami inuussutissarsiutaasinnaasut pillugit misissueqqissaarsimasoq.
- Suliffeqarfinnut Avannaani aallartisarusuttunut misissuineq tunngavissaalluassaaq, Jess Svane oqarpoq.
Avannaani umiarsualivinnik aallaavinnik angerlartarfinnillu sanaartornissamut nalunaarusiaq ilaatigut iluaqutaassaaq, borgmesteri oqarpoq.
Ataatsimeersuarneq Kommuneqarfik Sermersuumit, Aatsitassanut Ikummatissanullu Pisortaqarfimmit Sulisitsisullu Peqatigiiffiannit aaqqissuunneqarpoq.
