Aatsitassat misissorneqarsinnaalissapput
Aatsitassanik misissuisarfissami Actlabs Greenlandimi sulisut qaammat qaangiuppat aatsitassat misissugassat siulliit misissorsinnaalissavaat.
NunaMineralsip qangali misissuisarfissaq sanatinniarlugu pilersaarutigisimavaa.
NunaMinerals, GrønlandsBANKEN Nuup kommunealu piginneqatigiillutik maanna misissuisarfissamik atortulersorluakkamik sanatitsipput katillugulu 4,7 millioni koruuninik aningaasaliisimallutik – misissuisarfissarlu canadamiunit aqunneqassaaq.
Misissugassat nunami maani misissorneqartalerpata qaammatini arfineq-pingasuni utaqqisoqartarunnaassaaq.
- Aatsitassat Nuummi misissorneqartalerpata siuariartoqassaqaaq. Misissorneqartut suunerinik akissutisiniarluta utaqqisarnigut malunnartumik sivikillissapput aatsitassanillu misissuisarfiutillit eqaannerusumik suleriaaseqalissallutik, NunaMineralsimi pisortaq Ole Christiansen oqarpoq.
Aatsitassanik misissuisarfissami aatsitassat assigiinngitsut 40-t misissorneqartassapput: Kuulti, platini, aluminiu, kanngussak, nikkeli, aqerlussaq zinkilu misissorneqartassallutik.
