Aatsitassat: Kinamiunngooq qallunaaniit soqutiginninnerupput
Politikkikkut nuimasuusimasoq taanna, aviisimi Berlingske Tidendemi, ullumi saqqummersumi, allaaserisami, kaammattuivoq, Naalagaaffeqatigiinneq Danmarkip pimoorunnerusariaqaraa.
Aatsitassat pillugit ilisimatusarneq, qallunaat-kalaallillu ataatsimut ingerlataat, annikillerujussuarsimasoq Uffe Ellemann-Jensenip isornartorsiorpaa, Kalaallit Nunaannilu aatsitassat pillugit Danmark soqutiginninngippallaannginnerarpaa, kinamiulli soqutiginninnerusutut ittut.
- Danmarkimi naalakkersuisut pinngitsuusaaginnarsinnaanngillat. Kalaallit kisimik sulissuteqassasut isumaqartariaqanngillat, kalaallimmi taama kiffartuunneqarsinnaanngillat. Isumannaallisaanermut politikki annertunerusoq eqqarsaatigalugu, Kinap aatsitassanut kisingajammi piginnittussaatitaanera akuersaarneqarsinnaanngilaq, politikeriusimasoq nuimasoq allappoq.
Kuupik V. Kleistip, Minik Rosing peqatigalugu, aviisimi politikenimi allaaserisami ataatsimoorlutik oqaaseqaataat Uffe Ellemannip tikkuarpai, oqarluni, tusaaniarneqarnerunissaminnut ikioqqullutillusooq suaartartut - Kalaallit Nunaanni pinngortitami pisuussutit uumaatsut piiarneqarnissaasa inuiaqatigiinnut iluaqutaanissaat ataatsimoorluta qulakkeerniartariaqaripput.
