Aatsitassat Ikummatissallu pillugit ataatsimiititaliaq utaqqisaavoq
Kinguartitsineq ualigaa naluaarutigineqarmat Inatsisartunut ilaasortanit kissaammissutigineqaqaaq, partiillu gruppinik ataatsimiigiaqqusipput, pisoq oqaluuserineqarniassammat.
Partiilli eqqarsarfeqareermata ataatsimiinnermi pisortaq Justus Hansen, Demokraatineersoq, erseqqissaavoq, Aatsitassat Ikummatissallu pillugit ataatsimiititaliap pilersinneqarnissaata ukiamut kinguartinneqarnissaa Inatsisartut siulittaasoqarfiata aalajangiusimagaa.
- Ataatsimiititaliamik pilersitsinissaq paragraf 8-mi allassimasoq naapertorlugu Inatsisartut ukiaru ataatsimiilerpata aatsaat pisinnaavoq, Justus Hansen oqarpoq.
Inatsisartut siulittaasoqarfiata aamma aalajangiusimavaa Aatsitassat Ikummatissallu pillugit Pisortaqarfik Inuussutissarsiornermut ataatsimiititaliap ataaniikkallartoq.
Kalaallit Nunaanni Aatsitassat Ikummatissallu pillugit Siunnersuisoqatigiit, Namminersorneq siorna juunip ulluisa 21-anni eqqunneqarmat atorunnaartoq, Aatsitassat Ikummatissallu pillugit ataatsimiititaliap taarsissagaa eqqarsaataavoq.