Aatsitassat akileraarusersorneranut suleqatigiit

Aningaasaqarnermut siunnersuisoqatigiit siulittaasuat Professor Torben M. Andersen suleqatigiinnut siulittaasussatut toqqarneqarpoq.

-Qulakkeerusupparput qaquguluunniit Kalaallit Nunaat aatsitassarsiortoqalissagaluarpat aningaasarsiornikkut pitsaanerpaamik isertitaqartuartarnissaa, Aningaasaqarnermut Naalakkersuisoq Maliina Abelsen oqarpoq.

-Pingaaruteqarluinnarpoq suleqatigiit oqimaaqatigiissarilluarnissaat, tassami nunatsinni inuussutissarsiummut nutaamut aatsitassarsiornermut sammisumut aallarnisaassagutta aningaasalersuerusussinnaasunut orniginassuseqartariaqarpugut, Aningaasaqarnermut Naalakkersuisoq Maliina Abelsen oqarpoq.

Suleqatigiit akileraarusersuinermut ilisimasallit arlaannaanulluunniit attuumassuteqanngitsut Kalaallit Nunaanni aatsitassarsiornikkut periusissamik siunnersuisussat suliassaasa nassuiaatissaat Naalakkersuisunut akuersissutigineqarpoq. Suleqatigiissitaliornermilu aatsitassarsiornermi isertitaqarnissaq qulakkeerusunneqarpoq. 

-Qulakkeerusupparput qaquguluunniit Kalaallit Nunaanni aatsitassarsiortoqalissagaluarpat aningaasarsiornikkut pitsaanerpaamik isertitaqartuartarnissarput, Aningaasaqarnermut Naalakkersuisoq Maliina Abelsen oqarpoq.

Professori Torben M. Andersen suleqatigiinnut ilisimasalinnut siulittaasussatut toqqarneqarpoq, suleqatigiissitallu suliffeqarfinnut akileraartarnermut inatsisaasut misissuiffigissavaat naliliiffigalugillu ,aamma suleqatigiit aatsitassanut, kulbrintimut erngullu nukissiuteqarnikkut akileraarusersuinissamut periusissiamik innersuussuteqassapput. Aamma soorlu nunamiit nunamut allamut aningaasanik iluanaarniuteqarluni nuussisarnerup pinngitsoortinnissaanut suleqatigiit innersuussuteqarnissaat Naalakkersuisuniit naatsorsuutigineqarpoq.

-Naatsorsuutigilluinnarparput suleqatigiit tatiginartunik innersuussuteqarnissaat. Suleqatigiissitaniilli innersuussutigineqartut naapertorluarneqaqqissaartanngillat,

Pingaaruteqarporli nunarsuarmi ilisimasat pitsaanerpaat pissarsiarinissaat, paasisimasaqarluarluta aalajangersinnaaniassagatta, Aningaasaqarnermut Naalakkersuisoq Maliina Abelsen oqarpoq,

Suleqatigiissitami ilaasortat aatsitassarsiornermi akileraartarnermut immikkut ilisimasaqassasut aamma erseqqissaatigineqarpoq, taakkualu nalunaarusiaat siulleq 2014imi aprilimi saqqummiunneqassaaq nalunaarusiallu aappaa 2014imi julimi saqqummiunneqassasoq naatsorsuutigineqarpoq.