Aatsitassarsiutileqatigiiffiit arlaqartut suliniutinik piareersimasuuteqarput
London Mining siornatigut eqqaaneqareersutut Isukasiani atuinissamut akuersissummik tunineqarnissamik qinnuteqaateqarsimavoq. Ingerlatseqatigiiffiillu allat sisamat atuinissamut akuersissummik tunineqarnissamik qinnuteqassamaarput, Naalakkersuisut ilisimatitsipput.
Killavaani aatsitassanik qaqutigoortunik atuinissamut akuersissummik qinnuteqaammik Naalakkersuisut tigusaqarsimapput. Ingerlatseqatigiiffik Tanbreez, akuersissummik tunineqarnissamik qinnuteqartuuvoq. True North Gems aamma Qeqertarsuatsiaat eqqaanni rubininik atuinissamut akuersissummik qinnuteqaateqarsimavoq.
Ingerlatseqatigiiffiup Ironbankip Tunup avannaarsuani Citronenfjordimi zinkimik aqerlumillu piiaaniarluni atuinissamut akuersissummik qinnuteqarnissaa Naalakkersuisut aamma naatsorsuutigaat.
Siornatigut eqqaaneqareersutut Greenland Minerals and Energy Narsap eqqaani Kuannersuarni aatsitassanik qaqutigoortunik atuinissamik aamma soqutiginnippoq.
Siumup siulittaasuata Aleqa Hammondip paragraf 37 tunngavigalugu apeqquteqaateqarluni aatsitassarsiornerup qaammarsaavigineqarnissaa kissaatigisimavaa. Inatsisit qanoq sukkatigisumik akuersissutigineqassanersut ingerlatseqatigiiffinnit aalajangerneqartussaanersoq ilaatigut Naalakkersuisunut apeqqutigaa. Tassani suliniutit angisuut pillugit inatsit eqqarsaatigaa, taassumami taasissutigineqarnerani Siumut akuersinanilu itigartitsinngilaq.
- Inuussutissarsiornermut aatsitassanullu naalakkersuisoq Ove Karl Berthelsen akivoq, Inatsisartut siulittaasoqarfiat ullormut oqaluuserisassanik aalajangiisartuusoq, aammalu suliassaq tuavisaarunneqarsimanasorinngikkini.
Naalakkersuisut upernaakkut ataatsimiinnermi suliniutit angisuut pillugit nassuiaateqarneranni inatsisissatut siunnersuutip ilanngussatut kakkiunneqarsimanera tunngavilersuutigaa. Siunnersuut inaarutaasoq tallimanngormat akuersissutigineqarpoq tusarniaanermilu akussuteqaatit partiinut tamanut tunniunneqarsimallutik.
Ove Karl Berthelsenittaaq ilisimatitsissutigaa suliniutit angisuut pillugit inatsisissap marsimut kinguartinneratigut London Miningip suliniutaa ajornakusoortumik inississimassagaluartoq.
