Aatsitassarsiulernissamut nunaqarfimmiut piukkunnarsarumavaat

Nunaqarfimmiut aatsitassarsiormi sulinissamut piukkunnarsarneqassapput. Taama isumaqarput politikerit nuimasut pingasut Siumumeersut, taamaattumik tamanna siunertaralugu nunaqarfimmiut pikkorissartinneqarnissaannut aappaagumut aningaasanut inatsimmi immikkoortitserusupput.
apriilip 15-at 2009 08:21

Tassa naalakkersuisut siulittaasuat Hans Enoksen, Aningaasaqarnermut naalakkersuisoq Per Berthelsen aamma folketingimut ilaasortaq Lars-Emil Johansen maanna nunaqarfiit siunissaat pillugit oqallinnermut taama oqaaseqaateqarput.

Taakkua tikkuarpaat Nunatsinni siunissami aatsitassarsiorfinni, uuliasiorfinni aluminiuliorfinnilu sulisussaaleqisoqalersussaasoq, taamaattumillu nunaqarfimmiut tamakkunani sulisussatut ilinniartinneqartariaqartut.

- Isumaqarpugut nunaqarfimmiut sulisinnaasut tamarmik neqeroorfigineqartariaqartut, suliffiulersussani taaneqartuni sulisuunissaminnut piukkunnarsaataasumik pikkorissarnissaminnut, politikerit taakku pingasut ataatsimoorlutik nalunaarumminni allapput.

Aatsitassarsiorfinni, uuliasiorfinni assigisaanilu sulineq ima ingerlanneqakkajuppoq, soorlu qaammatit pingasut suligaanni qaammat ataaseq sulinngiffeqartoqartarluni.

- Nunaqarfimmiut piffissap ilaani piniarnermik aalisarnermillu inuutissarsiuteqarnertik pigiinnarlugu aningaasarsiorfissaqarsinnaalissapput, politikerit taakku pingasut allapput nangillutillu:

- Taamaalilluni nunaqarfinnik inuerutitsiniarneq oqaluuserisariaarutissaaq, akerlianilli nunaqarfiit ullumikkornit annerusumik ineriartortinneqarsinnaalissallutik.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq