Aatsitassarsiortut aningaasaliisussanik ujarlernialerput

Nunatsinni aatsitassarsiortartut, NunaMinerals, Danmarkimi aningaasaliisunit 11 million koruuninik pissarsiniarsarilerput.

Kuultisiorsinnaanissaq qulakkeerniarlugu aningaasat taakku pissarsiariniarneqarput.

Nuup iluani Qeqertarsuarmi kuultisiortoqarsinnaassanersoq misissorneqarniarpoq, aningaasallu pineqartut ilaasa tassunga atorniarneqassapput.

Aktia ataaseq 100 koruuneqarpoq, 11 million koruunillu pissarsiariniarneqarmata, aktiat 110.000-it misilillugu tuniniarneqarput.

Aktianik tuniniaasarnerit qanoq pisarnersut, NunaMineralsimi pisortap Ole Christiansenip ima nassuiarpai:

- Aktianik tuniniaanerit nalinginginnaasumik imatut ingerlanneqartarput aktianik piginnereersut siullermik saaffigineqartarlutik, taakku akimik aalajangeriikkamik akiliillutik pisisarput, saniatigullu nutaanik pisisoqarusuttoqarpat qaffasinnerusumik akiliilluni taamaaliortoqarsinnaavoq, Ole Christiansen oqarpoq.

NunaMinerals Namminersornerullutik Oqartussanit 1998-imi aallartinneqarpoq, Namminersornerullutillu Oqartussat 61 procentimik piginneqataapput, sinneri 39 procentit inuinnaat piginneqataaffigaat.

NunaMineals siorna 2,3 million koruuninik amigartoorpoq, ilanngaaseereerlunilu kaaviiaartitai 83.000 koruuniusimallutik.