Aatsitassarsiortut amerlissangatippaat
MT Højgaardip ilimagaa nunatsinni aatsitassarsiorneq 2011-mi annertuseriassasoq namminersorlutik oqartussanit naatsorsuutigineqarmat aatsitassarsiorfinnik ammaaniarluni qinnuteqaatit pingasut tunniunneqassasut.
Qallunaat sanaartornermi suliffeqarfiutaat taanna aatsitassarsiortuni suliassaqassaluni neriuttoq, atuagassiq Ingeniøren allaaserinnippoq.
Umiarsualiviit aqquserngillu nutaat sananeqartussaapput aatsitassarsiorfiit nutaat aallartisarneqalerpata tassalu taakkorpiaat suliassaqarfigisinnaassallugit MT Højgaard neriuppoq.
- Pilersaarusiorsimavugut ingerlatseriaasissarlu ilusilersoreerlugu suliassaqarfimmut suli aallartissimanngitsumut. Taanna siunissaq ungasinnerusoq isigalugu suliniutaavoq taamaattumik sulisussarsisimavugut aatsitassarsiornermi immikkut pikkorissarsimasunik aamma taakku paasisinnaavaat aatsitassarsiortitsiviit aatsitassanillu ujarlertut qanoq eqqarsariaaseqarnersut. Suliassaqarfik taanna arriikkaluamik ukiut kingulliit annertusiartorsimavoq, MT Højgaardip aatsitassalerinermut immikkoortoqarfiani pisortaq Joánnes Niclassen Ingeniørenimut oqarpoq.
Maniitsup eqqaani olivinisiorfik Seqinnersuusamiittoq ammarneqartussanngormat MT Højgaard umiarsualiviliortuuvoq.
