Aatsitassarsiortut aatsaat taama amerlatigipput

Aatsitassanik ujarlernerit nunatsinni aatsaat taama amerlatigipput, siornamut sanilliullugit aasamanna aatsitassarsiorneq marloriaatinngorsimalluni.

Nunatsinni misissuinerit 40-it missaanniittut ingerlanneqarput, taakkunannga 15-t nutaajullutik. Ukiormannalu qillerinerit assigiinngitsut aamma aatsaat taama amerlatigalutik.

- Sinerissami qillerinerit arfineq pingasut assigiinngitsut massakkut ingerlanneqarput. Guld-inut, diamant-inut, nikkel-inut, molybdæn-inullu misissuilluni qillerisoqarpoq. Savimminermut zink-imullu misissuisinnaanermut akuersissutinik aamma tunniussisoqaqqammerpoq, Annette Jørgensen Aatsitassanut Ikummatissanullu Pisortaqarfimmi AC – fuldmægtig-i oqarpoq.

Molybdæn-imik ujarlernerit juli-mi august-imilu tunumi ingerlanneqarput. Molybdæn-i tassaavoq sisak-mut manngersaat. Nalunami Nuullu eqqaani Qeqertarsuarmi august-imi guld-imik qilleraluni misissunerit aallartissapput, taavalu Kangerlussuup kujataani sumiiffinni assigiinngitsunni marlunni diamant-eqarneranik misissuisoqassalluni.

Atammimmi olivin-eqarneranik misissuinerit aallartereersut ingerlaannassapput.

Nunami misissuinerit saniatigut aamma Davisstrædemi immap naqqani olie-mik sajuppillatsitsisarluni misissuinerit ingerlanneqassapput.