Aatsitassarsiornissaq soqutigineqangaatsiarpoq

Nunatsinni aatsitassanik ujaasineq ukiut marluk ingerlaneranni annertuseriapiloorsimavoq, tassa ujaasinermut aningaasaliissutigineqartartut ukiumut 40 millioni koruunit missaanniit 185 millioni koruuninut qaffariarsimammata, tamanna NunaMineralsip naatsorsuinerinit takuneqarsinnaavoq.

Aatsitassat ukiuni kingullerni akigissaartarsimaqimmata aatsitassalerineq soqutigineqaleraluttuinnarsimavoq.

NunaMinerals naapertorlugu suliffeqarfissuit amerliartuinnartut paasisimavaat Nunatta nunataata sananeqaataa soqutiginartuusoq, tutsuiginartumik demokrati-qartoq aningaasarsiornikkullu aaqqissuussaanera danskit koruuniat aqqutigalugu euro-mut qanittuusoq.

Sermersuup ilaata aakkiartornera soqutiginninnermut tapertaavortaaq. Tassami sermersuup Nunatta avannaarsua Tunullu avannaarsua tikikkuminnaatsissimagaluarpai.

Nuup Kangerluani Qeqertarsuarmi kuultisiornissamik pilersaarut NunaMineralsimut suli pingaarnersaavoq.

Misissuinerit inerneri pitsaassappata qillereqqinnissaq aamma misissueqqissaarnissamut sulluliornissaq pisariaqartinneqartussaapput.