Aatsitassarsiornissap unitsinneqarallarnissaa piumasarineqalerpoq
- Aatsitassanik piiaanerup avatangiisinut sunniutigisinnaasai pillugit innuttaasut isummertinneqarnissaat aatsitassanut inatsimmi amigaatigineqarpoq, taamaattumik Isukasiani aatsitassarsiorniarneq unitsinneqarallartariaqarpoq, Pinngortitaq aamma Avatangiisit pillugit Peqatigiiffik, Avataq, isumaqarpoq.
Isukasiani saviminissamik ukiuni 15-ini 15 millioni tonsinik piiasoqarnissaq London Mining-imit pilersaarutigineqarpoq.
Aatsitassanik piiaffissaq Isukasiata eqqaanniittoq Nuup avannaata kitaani 150 kilometerinik ungasitsigisumiippoq. Aatsitassanik piiasoqalerpat Qussummit timmut aqqusiniliortoqarniarpoq 103 kilometerinik isortartutigisumik, timmisartunut mittarfiliortoqassalluni Qussummilu umiarsualiviliortoqassalluni.
Aatsitassanik piiaanissamut innutaasut tusarniarneqarsimannginnerat
Pinngortitaq aamma Avatangiisit pillugit peqatigiiffimmit iluarineqanngilaq. Aatsitassanut inatsit nalimmassarneqartariaqarpoq, nunani allani aatsitassanik piiaalinnginnermi periuserineqartut assigalugit ingerlatsisoqassappat, Piitannguaq Tittussen Avatameersoq oqarpoq.
Nunani allani aatsitassarsiorniarnerni avatangiisinut tunngassuteqartut pillugit innutaasut isummersortinneqartarput, tamannalu Kalaallit Nunaanni aatsitassanut inatsimmi amigaataavoq, Piitannguaq Tittussen Avatamersoq oqarpoq.
Nuummi innutaasut novembarip qaammataani ataatsimiitinneqarput, ataatsimiinneq tamakkiisumik avammut nalunaarutigineqanngilaq, inuit taamaallaat 30-t missaanniittut ataatsimiinnermi peqataallutik.
Kommuneqarfik Sermersuup isumaa Avatamit aamma ujartorneqarpoq:
Pinngortitaq piujuatitsinissamillu immikkoortortaqarfik pilersinneqarnikuuvoq, immikoortortaqarfiup taassuma Alcoa pillugu aamma London Mining-ip pilersaarutaanut isumaa Avatamit ujartorneqarpoq.
Nunani allani aatsitassanik piiaaniarnerni avatangiisit pillugit inatsimmi, innutaasut isummersortinneqartarput, immikkoortuni sisamani, inatsillu taanna Kalaallit Nunaani aatsitassat pillugit inatsimmi amigaataavoq, Piitannguaq Tittussen oqarpoq.
Aatsitassanut inatsit atuutilermat aatsitassanut naalakkersuisoq Ove Karl Berthelsen neriorsuivoq inatsit ukiup ingerlanerani nalimmassarneqarumaartoq. Kisianni manna tikillugu allannguutaanik takussutissaqanngilaq, Piitannguaq Tittussen oqarpoq.
Aatsitassarsioqatigiiffissuit London Mining-itut ittut aallartitsinnagit unitsinneqartariaqartut Avataq isumaqarpoq, inatsit amigaateqartillugu akisussaassueqannginnerummat, Piitannguaq Tittussen oqarpoq.
Isukasiani aatsitassarsiorfiliornissamut atatillugu London Mining neriuppoq aqquserngit umiarsualivik mittarfiullu sanaartorneqarnissaaat aappaagu aallartinneqarumaartut.
Aatsitassanik piiaanerup ukioq 2015-imi aallartinneqarnissaa naatsorsuutigineqarpoq.
