Politikki

2017-imut aningaasanut inatsit: Aatsitassarsiornerup sammineqarpallannginnera Jessip tupigigaa

Sulinermik inuussutissarsiuteqartut suliffissaqarnissaannut aningaasanut inatsimmi immikkoortitsisoqarnerusinnaasoq, Sulinermik Inuussutissarsiuteqartut Kattuffiat siulittaasua Jess G. Berthelsen isumaqarpoq.

Allattoq Malik Brøns, Ivik Kristiansen

novembarip 23-at 2016 14:02

Angallannermut kiffartuussinissamik isumaqatigiissutinut aningaasaliinerunissaq, aatsitassarsiornerullu ukkatarineqarpallaannginnera, Sulinermik Inuussutissarsiuteqartut Kattuffiata siulittaasuata Jess G. Berthelsenip isornartorsiorpai.

- Uanga isumaga naapertorlugu aatsitassarsiorneq annertuumik sunniuteqalertussaavoq, namminiilivinnissarput aamma eqqarsaatigalugu. Taanna pingaaruteqqartorujussuartut isigaara, taamaattumik aningaasanut inatsit eqqarsaatigalugu aatsitassarsiornermut tunngasut taama annikitsigisumik allaaserineqarsimammata tupigilaarpara, Jess G. Berthelsen oqarpoq.

Aamma atuaruk: Siunissami unammilligassat annikillinavianngillat

Kiffartuussinissamik isumaqatigiissutit neqeroorutigineqaqqaarmata sipaaruteqarfiunissaat siunertarineqaraluarpoq.

Maannali ukiumut 22 millionit koruuninik naalakkersuisut aalajangerneratigut aningaasaliisoqaqqittoqartussanngorpoq.

Tamannalu Jess G. Berthelsenip iluarinngilaa.

- Taamatut 22 millionit koruunit qaavatigut ilisisariaqalerneq ilumut inuiaqatigiinnut massakkut akikinnerulernerpa? Aningaasat taakkua allamut atorneqarsinnaagaluarput, Jess G. Berthelsen oqarpoq, ilaatigut peqqinnissaqarfimmut ineqarnermut akiliutit appartinneqarnissaannut immikkoortitsinerusoqarsinnaagaluartoq oqarluni.

Aamma atuaruk: Kiffartuussinissamik isumaqatigiissutinut ilassutit takukkit