Aatsitassarsiornermik ilinniagaqartut amigaatigineqarput

Aatsitassat pillugit ataatsimeersuarnermi  Joining Forcesimi  Nuummi Katuami ullumi aallartittumi, aatsitassarsiorfiit nunatsinni aatsitassarsiornermik ingerlataqartut saqqumiigamik, nunaqavissunik sulisoqarnissamik pisariaqartitsisoqarnera pingaartillugu oqaatigaat.

-Ilinniartitaaneq pilersinneqareersimasariaqararluarpoq imaanngitsoq aatsitassarsiorfiit aallartippata taava sulisunik ilinniartitsisoqassasoq, piareersartariaqarpugut massakkut, Hans Kristian Olsen oqarpoq.

Taassuma oqaatigisinnaanngilaa qaqugu nunarput naammattunik aatsitassarsiornermik suliaqartunik peqalerumaarnissaat. Aatsitassat pillugit ataatsimeersuartunit Kalaallit Nunaat nersualaarneqarpoq, aatsitassarsiornermik ilinniarfimmik aallartitsisoqarsimammat, aatsitassarsiornermik sulisut ilinniarnissaannut periarfissiisumik, Hans Kristian Olsenip oqaatigaa.

Nunatsinni aatsitassarsiorniarlutik aallartisartut, nunaqavissunik sulisussanik amigaateqartarnertik pissutigalugu avataaneersunik tikisitsisariaqartarput, tamannalu  akisusarpoq.

- Aningasartuutit annertungaatsiartut angallannermut atorneqartarput. Illuatungaani Kalaallit Nunaanni nunaqavissut sulisorigaanni nunatta aningaasarsiorneranut iluaqutaassapput, Hans Kristian Olsen isumaqarpoq. 

Aatsitassarsiornermik ilinniagaqalernissamut soqutiginninneq annertusarneqassappat qaammarsaaneq pisaqariartoq Hans Kristian Olsen isumaqarpoq.

Taanna isumaqarportaaq aatsitassarsiortut sulinertik pillugu innuttaasunut paasissutissiinerusariaqartut.   Aatsitassarsiorneq uuliasiornerlu pillugit ataatsimeersuarneq, Joining Forces, Nunatsinnit Danmarkimit nunanilu allaneersunit peqataaffigineqartoq, aqagu naammassissaaq. Peqataasut katillutik 271-iupput.