Aatsitassarsiornermi professori: Nunatta akitsuuteqartitsinera piiaaffinnik suusupaginninnissamut kajumissaarutaasoq

Tamanna aatsitassarsiornermi professorip Sydafrikameersup Frederik Cawoodip apersorneqarneranik aviisimi Sermitsiami allaaserisami atuarneqarsinnaavoq.

London Miningimut royaltyt pillugit isumaqatigiissutaasimasup iluanaaruteqarfiunngitsoorartarsinnaanera tikkuarpaa. Akitsuutip qaffakkiartornera ajornartorsiutaavoq. Ukiuni siullerni tallimani royaltymik 1 procentimik akiliisoqartussaavoq, tamatumalu kingorna procentinik pingasunik qaffanneqassalluni, taava piiaaviup ukiuni 16-ini atuussimalernerata tungaanut qaffakkiiartussaaq 5 procentinngussalluni.

Taamatut aaqqissuussinermi suliniutit piffissap ingerlanerani ingerlallualeriartornissaannik isumaqarneq Frederik Cawoodip kukkusumik paasinnissimanermik tunngaveqarsoraa.

- Pissusiviusulli tassaaginnarput aatsitassanik tuniniaavik piiaaffiit ataasiakkaat atasinnaaassusaannut attuumassutikitsuussaammat imaluunniit attuumassuteqanngivilluni. Tassami saviminissaqarfimmut taamaattumut appasissumik akitsuuteqartitsineq kajumissaarutaarutaagajuttarpoq sivikitsumik siunertaqanngitsumillu ingerlatsinissamut Aatsitassarsioqatigiiffiit siulliullugit taamaammaat aatsitassaqarfiit akukinnerpaat pitsaanerpaallu samminiassavaat, tamatumalu kingorna immaqa piiaaffik qimallugu procentit qaffasinnerit atuutilerpata, Frederik Cawood aviisimut Sermitsiamut oqarpoq.

London Miningilli pisortaata Graeme Hossiep Sermitsiamut oqaatigaa tamanna ilumoortortaqanngilluinnartoq.

- Aningaasarsiornikkut isigalugu iliuutsit suulluunniit, atortussiassanik akukitsunik piiaanermik kinguarsaasut, kingorna piiaaffimmik ingerlatsineq akilersinnaajunnaarsissavaat taamalu piaaffiup atuuffissaanut piffissaq sivikillisissallugu, aammalu piiaaffiup sananeqarnissaa akisuupilussuusoq tikkuarlugu.

13,4 milliarderpianimmi naleqartussaavoq. Taamatulli aningaasartuuteqarnissap ukiut sisamat qaangiunnerini matuneqareersimanissaa aatsitassarsiutiuleqatigiiffiup naatsorsuutigaa.

Naalakkersuisup Jens-Erik Kirkegaardip Sermitsiamut aamma erseqqissaatigaa London Miningip iluanaaruteqarniaannarluni savimissap nalitunerpaartaa kisiat piiarnavianngikkaa. London Miningimummi isumaqatigiissummi pissuussutinik naleqquttumik atuisoqarnissaanik savinimissamillu akugissaarnerpaamik taamaallaat piiasoqannginnissaanik piumasaqaateqartoq aamma tikkuarpaa.