Aatsitassarsiornermi kikkut sumullu oqartussaappat?

Naammagittaalliortarfissarli arlaannaanulluunniit attuumassuteqartuussanngila? Tamanna suliniaqatigiiffiup Transparency Greenland-ip qularaa.

Aatsitassarsiornermut inatsimmi allannguutissatut siunnersuummi paragrafit ilaanni ima allassimasoqarpoq: "Aatsitassarsiornermut aqutsisoqarfiup Avatagiisinulluunniit aqutsisoqarfiup aalajangiussaanut naammagittaalliuutit Naalakkersuisunuinnaq apuunneqarsinnaapput".

Tassa aqutsisoqarfiit taakku marluk akisussaaffigiligassaat Aatsitassarsiornermut pisortaqarfiup akisussaaffigaa.

Naak naammagittaalliorsinnaanermut periarfissaalersussat Transparency Greenlandip ajoriffissaqartinngikkaluarlugit inatsisissap sukumiisumik suliarineqarsimannginnera erseqqarippallaannginneralu isornartoqartippaat.

- Kina sunut aaliangiisuusassava? Sutigummi tamatigut Naalakkersuisut aalajangiisuusartussaapput, taamaammat Naalakkersuisunuinnaq naammagittaalliuteqarsinnaaneq pissusissamisoorpasinngilaq. Inatsisileritooq Anders Meilvang, Transparency Greenlandimilu siulitaasuusoq taama oqarpoq.

- Aajuna ernumanartua: oqartussaasut arlaqartut uani pineqarput. Aalajangiussassarmi oqartussaasumit aalajangiiffigineqaqqaartariaqarpoq, tassalu taassuma aalajangiussaa naammagittaalliutigineqassappat oqartussaasumit allamit suliaq ingerlanneqartariaqarluni. Tassa Naalakkersuisut aalajangiussaasa naammagittaalliutigineqarsinnaanerata Naalakkersuisunuinnaq apuunneqarsinnaanera apeqqusertariaqarpoq. Naalakkersuisummi imminnut misissugarisinnaanngimmata, Aqutsisoqarfiup aalajangiussaanik naammagittaalliutaasartussat Naalakkersuisoqarfiup suliarisassavai. Taamaammat Aatsitassarsiornermut aqutsisoqarfiup Aatsitassarsiornermullu naalakkersuisoqarfiup imminnut attuumassuteqanngilluinnarnissaat qulakkeerneqartariaqassaaq, tamannalumi qulakkeerneqarsinnaappat inatsisissamut allannguutissaq ajoriffissaqartinngilara, Anders Meilvang oqarpoq.

- Kisiannili Aatsitassarsiornermut aqutsisoqarfik Naalakkersuisoqarfillu ullumikkutut isikkoqartillugit imminnut attuumalluinnartuupput, ataatsimoortutullu taasariaqarlutik. Taamaammat pissutsit taamaatsillugit uagut qisuariartariaqartutut misigisimavugut, tassami Aqutsisoqarfiup Naalakkersuisoqarfiillu imminnut atalluinartuunerat kipineqaqqaartariaqarpoq, aatsaammi taamaasiortoqarsinnaappat aalajangiusat pillugit naammagittaalliutaasussat naapertuilluartumik aatsaat suliarineqarsinnaalissammata, Anders Meilvang oqarpoq.