Aatsitassarsiorneq pillugu isumaqatigiinniartoqartariaqartoq ujartorpaa

Allattoq Mads Lynge
juulip 27-at 2006 10:41

Uuliasiortoqalissagaluarpat iluanaarutaasinnaasut pillugit, nunatta Danmarkillu akornanni isumaqatigiinniartoqapallattariaqartoq, Folketingimi ilaasortaq Inuit Ataqatigiinneersoq Kuupik Kleist oqarpoq.

- Isumaqarpunga aatsitassarsiorneq pillugu Danmarkimut isumaqatigiissusiornissaq nukingernartuusoq. Uuliasiulereernerup kingorna isumaqatigiinniartoqalissappat uagutsinnut ajornarnerulissaaq, Kuupik Kleist oqarpoq.

Uuliamik nassaartoqassappat iluanaarutaasut toqqaannartumik nunatta karsianut ilinagit, Norgemiut periuuserisimassaat malillugu aningaasaateqarfimmut ikineqarnissaat Kuupik Kleistip siunnersuutigaa, aningaasanillu atuisoqassappat aningaasaateqarfiup erniaannit atuisoqartassasoq.

Aatsitassat pillugit apeqqut Namminersornerulernissaq pillugu isumaqatigiinniartoqarmat iluanaarutissat sumi qanorlu inissinneqassanersut oqallisaangaatsiarsimasoq, Kuupik Kleistip eqqaassutissiissutigaa:

- Oqartoqarsinnaagunarpoq aatsitassarsiornermik nunamullu piginnittussaanermik tunngasut nunatta Danmarkillu akornanni qitiusut, eqqaamaneqassajunnarsivoq namminersornerulernissaq isumaqatigiinniutigineqarmat apeqqut taannarpiaq annertuumik akimmiffiummat, Kuupik Kleist oqarpoq.

Danmarkimi Konservativit, Dansk Folkepartiit SF-illu isumaqarput, nunatsinni uuliaqassappat naalagaaffiup ukiumoortumik tapiissutai ilanngarterneqartariaqartut.