Aatsitassarsiorneq pikkorissassutigineqartalissaaq

Nunatsinni aatsitassamik piiaanissamik eqqarsaat inuppassuarnik sulisussanik atorfissaqartitsissaqaaq, tamannarpiarlumi pillugu inunnik taama amerlatigisunik sulisussarsisinnaanissaq piviusunngortinneqarsinnaanersoq oqallisigineqartuartareerpoq.

Taamaattumillu Sisimiuni Sanaartornermik ilinniarfimmiit maanna pikkorissartitsisaqattaarnerit ingerlanneqaqattaarput.

Sanaartornermik ilinniarfiup pisortaa Jokum Møller ima nassuiaateqarpoq:

- Aatsitassarsiorneq eqqarsaatigalugu intreprenørinillu ilinniartitsineq 1977-imili Sanaartornermik ilinniarfik aallartimmalli ingerlappagut, kisianni massakkut aatsitassarsiornertaa suliffeqarfiit peqatigalugit pimoorullugu pilersaarusiorparput, Sisimiuni Sanaartornermik ilinniarfiup pisortaa Jokum Møller oqarpoq.

Taanna nassuiaavoq ataatsimiititalimik pilersitsisimallutik.

- Taanna ilaartornikuuarput aatsitassarsiornermik sulisuniit aammalu pisortaqarfinneersunik ilaasortaqalersillugu. Ataatsimiitaliami qulaajarneqassaaq suut atorfissaqartinneqarnersut, taannalu aallaavigalugu pikkorissartitsinerit aamma aallartisarneqassapput, Jokum Møller oqarpoq.

Taanna nassuiaavoq pikkorissartitsinissani assigiinngitsorpassuit ingerlanneqartassasut.

- Massakkut atoriikkatta ilarpassui atorsinnaareerput, soorlu qamutit angisoorsuit aqunnissaat, qaartiterinerit, aqqusinniornerit, oqarpoq nangipporlu:

- Pingaarnerpaajuvorli sillimaniarnissaq ingammik qaarusunni sulinermi tassami ullutsinni piumasaqaatit sakkortunerujussuupput taamani Maamorileqarallarneranut sanilliullugu, oqarpoq.

Nangilluni nassuiaavoq malittarisassat inatsisilluni aamma ilinniartitsissutigineqartassasut. Erseqqissaavorlu qaarusunni sulissagaanni tuluttoorsinnaanissaq pingaartuummat tuluttut ilinniartitsinissaq mininneqassanngitsoq. Oqaatsinillu pikkorissarfik suleqatigalugu tuluttut ilinniarnerit aallartinniaritik unnerpaa.

Siusinnerusukkut aatsitassarsiornermik sulinissamik soqutiginnittut Danmarkiliaqqaarlutik pikkorissartaraluarput – Danmarkimiit akiliunneqarlutik.

Pikkorissartitsinissat maanna nunatsinniit akilerneqarput, nunatsinnilu ingerlanneqassallutik kiisalu danskisut kalaallisullu ingerlanneqassallutik, soorluttaaq Jokum Møllerip oqaatigereeraa tuluttut ilinniartitsinermik aamma imaqartinneqassallutik.