Aatsitassarsiorfiit nakkutigineqarnertik namminneq akilertalissagaat
Aatsitassarsiorfiit erngup nukinganillu nukissiorfiit sulliviit nakkutilliisuinit nakkutigineqarnerusalissapput.
Nakkutilliinerit amerlanerit naammassineqartalerniassammata nakkutilliisut suliffeqarfinnut avinngarusimasunut nakkutilliiartortarnerannut suliffeqarfiit namminneq akiliisalissasut, danskit naalakkersuisuisa inatsisissatut siunniuppaat.
Piiaaffiit avinngarusimasuniittuummata sullivinnut nakkutilliisut nakkutilliiartorniaraangata, tamatuma akisusarnera, danskit naalakkersuisuisa tunngavilersuutigaat. Nakkutilliiartortarnerallu akulikillisinniarlugu suliffeqarfiit namminneq akiliisalissapput.
Inatsisissarli suliffeqarfinnut aallartisartunut sunniuteqassanngilaq, suliffeqarfiit misissueqqaarerminni aningaasartuutitigut artukkeeqqunagu.
Inatsisissatut siunnersuut Inatsisartuni ullumi oqallisigineqartoq partiinit tamanit taperserneqarpoq.
Siuinnersuutip aappassaaneerneqannginerani atatsimiititaliami suliarineqaqqaassasoq Siumumiit Partii Naleqqamiillu innersuussutigineqarpoq, illuani Inuit Ataqatigiit, Atassut Demokraatillu siunnersuut taamaatut isikkoqartiinnarlugu aappassaaneerneqarnissaanik kissaateqartut.