Aatsitassarsioqatigiiffiit pitsaanernik atugaqartinneqarnissaat ernumagaat

- Suliffeqarfiit nunatsinni ingerlatsisut assigiimmik atugassaqartitaanissaat kissaatigarput. Kalaallit Nunaanni suliffissuaqarnikkut ingerlatsisussat nunatsinni suliffeqarfinnitulli kattussuunnissamut piareersimanngippata, suliffeqarfiutigut suliffissuaqarnikkut ineriartornissamut peqataatissinnaanngilagut, Henrik Leth oqarpoq.

Siunissarlu ungasinnerusoq eqqarsaatigalugu tamanna aaliangiisuusussaasoq Henrik Leth isumaqarpoq.

- Ajornaatsunngussaaq. Suliffeqarfiutitik Nunatsinni pilersissavaat, suliffeqarfiillu Kalaallit Nunaannut tunngasumik suliaqartut Nunatsinni ingerlatsissaavaat, Henrik Leth oqarpoq.

Tamanna aatsitassarsiornermik ingerlatsisunut Naalakkersuisunit piumasarineqanngippat, Alcoap sulisartunik akissarsiakitsunik Kiinameersunik tikisitsiniarnera Sulisitsisut Peqatigiiffiannit tapersersorumaneqanngilaq.

- Taamaattumik inuussutissalerinermut inatsisip ukiuni arlaqartuni oqallisigineqarsimasup qanoq isumaqarpiarnera Naalakkersuisut eqqissillutik misissussagaat isumaqarpunga, Henrik Leth oqarpoq.

Inatsisit erseqqarinngippata nunatsinni suliffeqarfiit ineriartornermut katataanissaat Sulisitsisut Peqatigiiffiata ernumagaa.

- Aarlerinartua unaavoq nunap immikkoortuini suliffeqarfiit innuttaasullu peqataatinneqannginnerat, Henrik Leth oqarpoq nangillunilu:

-Takorluunngilarput suliffeqarfiit nunatsinneersut tamatuminnga ingerlatsisuunissaat. Ingerlatsisussat tassaassapput suliffeqarfiit nutaat, akileraarnikkullu periutsit allat atorlugit ingerlalissagunik taava sulisartunik nunaqavissunik aamma suliffeqarfinnik  nunatsinneersunik atuerusunngissinnaapput, taakkumi neqeroorusianik sanilliussuisinnaanngimmata. Taamaattumik tamatut inissinneqannginnissaq pingaaruteqarluinnarpoq, Henrik Leth naggasiivoq.

Namminersorlutik Oqartussat Sinniisoqarfiat ukiumut pingasut-sisamariarluni danskit aallartitaannut ataatsimiititsisarpoq tassanilu kalaallit ajornartorsiutaat qaqilerneqartarput.