Aatsitassaqarnermut Naalakkersuisoq: Massakkut aalajangisoqartariaqarpoq

Uranimut akuersaanngilluinnarnerup atorunnaarsinneqarnissaanut Inatsisartut aalajangiiffigisassaattut siunnersuutip aaappassaaneerneqarnissaa, Inatsisartut aappaagu ukiakkut ataatsimiinnissaannut kinguartinneqartariaqartoq, Demokraatit ippassaq oqaatigaat, siunnersuulli Aatsitassaqarnermut Naalakkersuisup Jens Erik Kirkegaardip illuatungilerpaa.
Allattoq Mads Lynge
oktobarip 10-at 2013 06:39

Innuttaasut sukumiinerusumik paasititsiniaavigineqaqqaartariaqarput, Inatsisartullu paasissutissat sukumiinerusut tunngavigalugit aalajangiisinnaassuseqartariaqarlutik. Demokraatit siulittaasuat Jens B. Frederiksen oqarpoq:

- Paasissutissat naammattutut massakkut isiginngilavut. Nalunaarusiap uuma inerniliinerata takutippaa Kalaallit Nunaata Danmarkillu akornanni suli aaqqiagiinngissuteqartoqarnera, uran pillugu kalaallit danskillu nalunaarusiaat nutaaq saqqummiunneqaqqammereersorlu, Demokraatit siulittaasuat Jens B. Frederiksen oqarpoq.

Demokraatit siulittaasuat Jens B. Frederiksen taama oqarpoq.

Inatsisartuni immikkut ataatsimiititaliamik partiinit tamanit ilaasortaaffigineqartumik uranimut tunngasunik suliaqartussamik aamma pilersitsisoqarnissaa, Demokraatit aamma siunnersuutigaat, soorlu Maniitsup eqqaani alumiiniumik aatsitsiviliortoqarnissaa pillugu immikkut ataatsimiititaliamik pilersitsisoqarnikuusoq, kommunillu aaqqissuuteqqinneqarnissaannut atatillugu aamma taamaaliortoqarnikuusoq.

Uranimut naaggaarluinnarnerup atorunnaarsinneqarnissaa Demokraatit isumaqataaffigaat, peqqissutsimulli avatangiisinillu innarliinngippat aatsaat piiasoqarsinnaasoq oqaatigalugu.

Aatsitassaqarnermulli Naalakkersuisoq Jens Erik Kirkegaard oqarpoq uranimut naaggaarluinnarnissap atorunnaarsinneqarnissaa maanna piffissanngortoq, oqallittoqareeqigamimi, oqarpoq:

- Taakku tunngavilersuutaat paasinaraluarput, kisianni politikkikkut aamma ilisimavarput aatsitassarsiortoqarsinnaavoq uranimik akoqalaartunik, peqqissuseq avatangiisillu innarlinngikkaluarlugit. Taamaammat assigiinngitsunik ukiorpaaluit kingulliit misissuereerlutalu nalunaarsioreerluta, innuttaasunillu ataatsimiisitsinerit arlallit aamma pereersut aalajangivinnissaq massakkut tullinnguuttutut uagut nalilerparput, Aatsitassaqarnermut Naalakkersuisoq Jens Erik Kirkegaard oqarpoq.

Uranimut naaggaarluinnarnerup atorunnaarsinneqarnissaanut aalajangiiffigisassatut siunnersuut Inatsisartut marlunngormat taasissutigisussaagaluarpaat, aalajangiinissarli ullumimut kinguartinneqarluni. Taamatut kinguartitsisoqarnera Naalakkersuisunit aalajangerneqarsimanngitsoq, Jens Erik Kirkegaardip erseqqissaatigaattaaq:

- Kinguartitsineq Inatsisartut siulittaasoqarfiata aalajangigarivaa, Naalakkersuisuninngaanniit aalajangerneqarnikuunngilaq. Taanna Inatsisartut suleriaasiat naapertorlugu namminneerlutik aalajangersinnaatitaaffigivaat, uagullu tamakkuninnga aalajangiinernut akuliussinnaanngilagut, Aatsitassaqarnermut Naalakkersuisoq Jens Erik Kirkegaard oqarpoq.