Aatsitassaqarfik januaarimi tiguneqassaaq
Namminersorlutik Oqartussat aatsitassanut tunngasunik akisussaaffimmik tigusiniarnermut atatillugu naalagaaffiup NunaOil-imik piginneqataassutai 21 millionit koruuninik naleqartut, inuiattut ullorsiornermi pisiarai.
- Naalakkersuisut nalilerpaat Namminersornermut pingaarnerusutut aatsitassanut tunngasut siullerpaanut ilaatillugit Namminersortunit tiguneqarnissaat, Inuussutissarsiornermut Aatsitassanullu Naalakkersuisoq Ove Karl Berthelsen inatsisartut aalajangiivigisassaatut siunnersuummi allappoq.
Aatsitassanut tunngasunut akisussaaffiup tassungalu atatillugu imaani nunamilu uuliasiorfiliani sullivinni isumannaallisaanermut akisussaaffiup naalagaaffimmit tiguneqarnissaannik apeqqutit inatsisartut ullumi suliarissavaat.
Kalaallit Nunaanni Inatsisartut aatsitassanut inatsisissaattut siunnersuut Inatsisartut ukiaanerani ataatsimiinneranni aamma sammineqarumaarpoq.
