Aatsitassanut Pisortaqarfik oqaaseqarusunngilaq
Immikkoortoqarfimmi pisortaq, John Telling oqarpoq pisimasoq inummut aalajangersimasumut attuumassuteqarmat, politiinillu suliarineqartillugu uppernarsaatigineqartussanut akulerukkusunnginnamik oqaaseqarfigisinnaanagu.
Pisimasoq ukioq ataatsip matuma siorna aallartippoq. Taamani Thue Noahsen Kangerlussuarmiit aallalerluni timmisartumi ujaraatiminik arsaarneqariataarpoq. Tamanna pivoq naak Thue Noahsen Aatsitassanut pisortaqarfimmiit rubininik 5 kilonik nunanut allanut tuniniaanissaminut akuersissummik kaasarfimmioqaraluartoq. Taamaamat Thue Noahsenip sooq arsaarneqarsimanerluni paasisinnaanagu ippassaq Radioaviisimi oqarpoq.
Aatsitassanut pisortaqarfimmiit avammut tuniniaasinnaanermut akuersissumik tuniseriarlutik sooq arsaarinnissimanersut Radioaviisimiit paaserusukkaluaratsigu tassa pisortaqarfimiit oqaaseqarfigineqarusunngilaq.
Pisimasup ingerlaqqinerani Thue Noahsen aatsitassat pillugit inatsimmik unioqqutitsisimasutut nassuertillugu, arsaarneqarsimanerminut politiinit atsiugassinneqaraluarami atsiorusunngilaq.
