Aatsitassanut inatsisissaq namminersulernermut pingaaruteqartoq
Taassumali aamma erseqqissarpaa, aatsitassanut inatsisissap, ukiortaamiit akisussaaffigineqartussanngorlugu maanna sulissutigineqartup, suliarineqarnera peqqissaarulluinnarnissaa pingaaruteqarmat.
- Aatsitassanut inatsisip tigunissaa isumaqatigiinniarnerni manngernerpaasimavoq, kukkusumillu suliarineqaraluarpat,
isumaqatigiinniarnerit aallarteqqittariaqassapput, Inuussutissarsiornermut aatsitassarsiornermullu naalakkersuisoq, Ove Karl Berthelsen oqarpoq.
Aatsitassanut inatsisissaq, Inatsisartuni siullermeerlugu novembarip qulingani suliarineqarmat, Inatsisartuni partiit tamarmik iluarisimaarpaat, tassalu atuutilerpat Nunatsinni aatsitassanik atuinissamut nunallu iluani pisuussutinik atuinissamut Namminersorlutik Oqartussat piginnittussaalissapput.
Aatsitassanut inatsisissatut siunnersuut Inatsisartuni novembarip 24-ani aappassaaneerneqareeruni novembarip 27-ani inaarutaasumik suliarineqassaaq, partiillu maannatut akuersaaginnarpata, suliassaqarfimmik tigusinissamik siunertaqarluni Naalagaaffimmut saaffiginninnissaq tullinnguutissaaq.
