Aatsitassanut inatsisissaq kattuffinnit kinguarteqquneqarpoq

Inatsisartuni ullormi naggataamik ataatsimiiffiusussami aatsitassat pillugit inatsisissap oqaluuserineqarnissaa kinguarteqqullugu kattuffiit suliniaqatigiiffiillu katillugit tallimaasut maanna piumasaqarput.

Grønlands Stenklubip, Peqatigiiffik 16. Augustip, Earth Charterip, avatangiisit pillugit kattuffiup Avatap, Narsami Urani Naaggaarparpup kiisalu inuit issittormiut kattuffiata aatsitassanut inatsisissap tusarniaassutigineqarnera amigaralugu maanna kinguartinneqarnissaa piumasaraat.

aalajangiinissamut akerliusut suliniaqatigiiffiit kattuffiillu tallimat allapput inatsisissatut siunnersuutip aalajangiiffigineqartussap imarisamigut tusarniaassutigineqartumit allaanerusoq, aappaattullu inatsisissaq pillugu pisortatigoortumik tusarniaarsoqarsimanngitsoq, pingajuattullu suliniaqatigiiffiit kattuffiillu attuumassuteqartut tusaaneqarsimanngitsut.

Aatsitassanut inatsissatut siunnersuut pillugu Grønlands Stenklub, Kalaallit Nunaanni Ujaqqerituut isumaqataallutik ippassaq nalunaaraluarput. Maannali isumaqataajunnaarlutik ujaqqerituut siulittaasuat Bjarne Ljungdahl allappoq.

- Inatsit akuersissutigineqarpat inuit ataasiakkaat aatsitassanik katersisinnaanissaat ilimagisamit sukateriffigineqartussaassaaq, Bjarne Ljungdahl oqarpoq.

Kinguartitsinissamik kajumissaaruteqartuupput: ICC-mit, Aqqaluk Lynge, Earth Charterimit Finn Lynge, Avatamit, Mikkel Myrup, Kalaallit Nunaanni Ujaqqerituunit, Bjarne Ljungdahl, Uraanni Naaggaarparput-mit, Kalistat Lund kiisalu Peqatigiiffimmit 16. Augustimit, Niels E. Madsen.

Peqatigiiffik 16. Augustip Inatsisartut ataatsimiittarfiata silataani nalunaaqutaq ullup qeqqanut akerliussutsumik takutitsiniarput.