Aatsitassanut ilinniarfik nutaamik piumasaqarput

- Aatsitassarsiornermi ilinniarfimmut unammillertaanngikkaluamik maani avannaani atuarfimmik pilersitsisoqarnissaa taanna pilerigineqartorujussuuvoq, Qaasuitsup kommuniani borgmester Jess Svane Aatsitassarsiornermi inuussutissarsiutit ineriartorteqqinnissaannut isumasioqatigiisitsineq naammassereertorlu taama oqarpoq.

Namminersortut, soorlu unnuisarfiutillit, sanasut aamma innaallagialerisut, Piareersarfiit, Aatsitassarsiornermik aamma uuliamik misissuinermik ingerlatsisut Qaasuitsup kommuniani aamma Namminersorlutik oqartussani atorfilittat ulluni marlunni isumasioqatigiipput.

Tassanilu paasineqarpoq, inuussutissarsiutini suliaqareersut, suliffissaaleqisut inuusuttullu aatsitassarsiornermi uuliasiornermilu inuussutissarsiuteqalernissaannut pikkorissarfiit atuarfiilluunniit amigaataasut:

-Atuarfimmik kivitsiffiusussamik amigaateqarpugut maani avannaani, Qaasuitsup kommuniani inuussutissarsiornermut pisortaq Lars Lennert Sandgreen oqarpoq.

Isumasioqatigiinnermi inerniliunneqartut maanna imaqarniliorneqalerput. Pikkorissaasarfiillu imaluunniit atuarfiit pilersinneqarnissaat siunertaralugu avannaani namminersorlutik inuussutissarsiuteqartut, kommuni Piareersarfiillu qanimut suleqatigiinnissaat siunniuneqarpoq. Piviusunngortinniarlugulu politikkikkut sulissutigineqarusuppoq.

- Isumaqaratta avannaani pisussat pingaluttuartullu ima annertutigisut pinngittoorneqarsinnaanani avannaatungaani pikkorissaavimmik imaluunniit ingerlaqqinnissamut tunngavissikkumalluni pikkorissartitsiviusinnaasumik pilersitsinissaq, Qaasuitsup kommuniani borgmesteri Jess Svane oqarpoq.

Qaasuitsup kommuniani piareersarfinni ilinniartitsissutigineqartartut naleqqussarneqarnissaat aamma isumasioqatigiinnermi inerniliunneqarpoq.