Aatsitassanik uuliamillu ujaasiniartut Nunatsinnut akileraartassapput
Taamaattumik akuersissutinik tunineqarsimasut aatsitassarsiornermillu suliallit tamarmik ilanngunneqarlutik Kalaallit Nunaannut killilimmik akileraaruteqartussaanerat Qullersaqarfiup siunnersuutigaa. Tamannalu misissueqqaarnermi misissuinernilu ”Ulloq siulleq” aallarnerfigalugu atuutissasoq siunnersuutigineqarpoq.
Allannguiniarnermi siunertarineqarpoq inatsimmi amigaataasut ilanngunneqarnissaat aamma uuliasiornermi gassimillu ujaasinermi suut akileraaruteqaataasussaanerisa ersarissarneqarnissaat.
Akileraartarnermut apeqqut saqqummiunneqarpoq, Nunatta immami uuliamik ujaasinermut atatillugu akileraarutinik akiliisitsiniarsinnaanera nunani tamalaani akileraarnermik ilisimasalinnit apeqquserneqarmat.
Matumani pineqarlutik immap naqqani aamma immap naqqani nunavimmut atasortaata killingani ujaasisoqartillugu.
Nunani tamalaani akileraartarnermut ilisimasallit oqaatigaat, Nunatta 1991-imi uuliasiornermi akileraarutaasartunik iluarsartuusseqqinnermini, immap naqqani nunavimmut atasortaanut tunngasuni ujaasinermi akileraarutitigut malittarisassaliornissaq puigorsimagaa. Naak akileraartarnermut qullersaqarfiup immikkut ilisimasallit isumaqatigeqqissaanngikkaluarlugit iliuuseqarniarpoq. Taamaattumik akileraartarnermut inatsisit nunanut tamalaanut aalajangersakkanut naleqqussarniarneqarput.
Aalajangersakkat taamaalillutik ersarinnerulissapput, tassami Nunatsinni aatsitassanik ujaasisut misissueqqissaartullu Nunatsinnut akileraartussaassammata. Matumani apeqqutaatinnagut suliffieqarfiup Nunatsinneersuunersoq Nunattaluunniit avataaneersuunersoq.
Tamanna Nunatta karsianut qanoq sunniuteqassanersoq nalunarallarpoq, tassami qanoq ujaasisoqartiginera apeqqutaassammat. Maannali ersarissarneqarpoq suliffeqarfiit ujaasisussatut akuerineqartut, sulliviillu allat taakkununnga attuumassuteqarsinnaasut sulisuilu tamakkerlutik Nunatsinni nammineerluni immersugassamik immersuisassapput.
Taamaattorli Nunatta karsianut qanoq iluaqutaatiginissaannut Nunat Kalaallit Nunaannut akileraarutitigut qanoq isumaqatigiissuteqarsimanersut apeqqutaassaaq. Taamatulli akileraarusersuinerup iluaqutaanissaa qularutissaanngilaq.
Aalajangersakkat nutaat suliffeqarfinnit atorneqarnissaat qulakkeerniarlugu nunanit allanit aatsitassarsiortut kalaallinik aallartitanik ilaqarnissaat siunnerfigineqarpoq, suliffeqarfiillu taakku sulisuisa Nunatta karsianut akileraarutinik akiliisarnissaat aallartitat qulakkeerniassavaat.
Aallartitat eqqartuussissuserisuunngikkunik naatsorsueqqissaartarfinneersuunissaat ilimanaateqarpoq.
