Aatsitassanik piiaaniarluni qinnuteqaat suliarineqanngitsoq
Tanbreez Miningip pilersaarutigigaluarpaa, Killavaasani aatsitassaq eudialyt-i aappaluttoq aamma aatsitassamik qaqutigoortumik taaneqartartoq, piiarniarlugu.
- Piiaanissamut akuersissummik qinnuteqaatip suliarinissaa pisariusorujussuuvoq, taamaattumik qinnuteqaat tunniunneqaraangat aatsaat suliarilersarparput - Killavaasanullu tunngatillugu taanna suli suliarineqalinngilaq, Aatsitassanut Pisortqarfiup pisortaa, Jørn Skov Nielsen aviisimut Sermitsiaq oqarpoq.
Sermitsiap paasisai naapertorlugit, qinnuteqaat ringbind-inik 18-inik amerlassuseqartut, Tanbreez Mining sinnerluugu entreprenørselskab-imit MT Højgaard-mit, Aatsitassanut Pisortaqarfimmut tunniunneqarsimasut tuluttinnaq allataapput.
Taakkulu inatsisit naapertorlugit peqqussutinut naapertuutinngillat, tassami qinnuteqaammi kalaallisut allassimassaaq, nalilersuinerit qitiusut tassalu avatangiisit aamma inuiaqatigiinnut sunniutaasinnaasut allassimassallutik, taakkumi akuersisoqannginnerani Nunatsinni paasiniaatsitsinernut atugassaassammata.
Tanbreez Miningip Sermitsiamut ullumi saaffiginnissutiminni oqaatigaat, Aatsitassanut Pisortaqarfimmut nassiussatik qinnuteqaatissaminnut missigersuutaannaasut. Tanbreez Mining-illu pisortaata, Hans Kristian Schønwandt-ip oqaatigaa neriulluni Aatsitassanut Pisortaqarfiup tuluttut allassimasut isummerfigisassatut tigujumaaraat, tassami qinnuteqaatertik, inatsisit atuuttut malillugit taanna kalaallisut nutseriarlugu kingusinneruskkut nassiukkumaaramikku.
Aatsitassanulli Pisortaqarfiup pisortaata, Jørn Skov Nielsen-ip Sermitsiamut oqaatigaa, qinnuteqaatip kalaallisut allassimaneri tigutinnagit qinnuteqaat suliariniarnagu.
Killavaasani aatsitassaq malm-i 4 milliard tonsi missaannik annertussuseqartoq, Tanbreez Miningip nalilersimavaa, taakkulu naatsorsuutigigaluarpaat aatsitassanik piiaaneq 2014-imi aallartissinnaassallugu.
