Aatsitassanik piiaaneq aallartippat kalaallit akuullualissapput

Naak Cairn Energy Nunatta imartaanik uuliamik kingullermik ujarleramik kalaallinik sulisussaaleqisimagaluartoq, kalaallit piiaalernermi akuullualissasut, Aatsitassarsiornermut Naalakkersuisoq isumalluarpoq.
januaarip 15-at 2014 05:36

Uuliamik aatsitassanilluunniit ujarlerluni misissuinerni suliffiit ukiup ilaannaani suliffiunerat pissutigalugu kalaallit tamakkunani sulerusunerat killeqarsinnaasoq, taassuma ilimagaa.

- Ukioq manna qinnuteqartoqarnikuunngilaq uuliasiorneq eqqarsaatigalugu. Kisianni aamma naluneqanngitsutuut uuliasiornermi qillerinerit aasakkuinnaq ingerlanneqartartut, sivikitsuinnarmillu ingerlanneqartarlutik, Jens Erik Kirkegaard oqarpoq.

Cairn Energy piffissami aalajangersimasumi qillerisarpoq. Taamaakkaluartoq tassanngaanniit ajuusaarutigaat, suliffissarsiortut  nunaqavissut ikimmata. Ilaatigut SIK-miit tupaallapput, tassanngaanniillu  kaammattuutigaat, Cairn Energy Nunatsinni soqutigisaqaqatiinnut oqartussannullu suleqatiserinnissasoq.

Aatsitassaqarnermulli Naalakkersuisup ernumanngilaq. Taassuma ilimagaa, uuliamik qalluineq aatsitassanillu piiaaneq aallartippat, kalaallit suliffeqarfinni tamakkunani akuullualissasut.

- Piiaaffiit aallartippata nunarput iluaqutissartavii aallartissapput. Taakkua ataavartumik suliffiusinnaammata aammalu ukioq kaajallallugu suliffiusinnaallutik - ukiorpassiarni. Taamaammat misissuinerit aasaanerani ingerlanneqartartut soorunami kissaatiginaraluarpoq amerlanerpaat kalaaliussasut, kisianni iluanaarutissartaqarpianngillat, Jens Erik Kirkegaard oqarpoq.

Aatsitassalerinermi Ilinniarfik uuliasiornermi sulisussanut  pikkorissartitsinissamut Namminersorlutik Oqartussanit 2011-imili kingullermik tapiiffigineqarpoq. Ukioq mannali aamma uuliasiornermi qillerinissamik qinnuteqartoqanngimmat uuliasiornermi sulisussanik aamma pikkorissartitsisoqarnavianngilaq. 

Jens Erik Kirkegaard isumaqarpoq ilinniartitsinerit pikkorissartitsinerillu uuliasiornermi misissuinerit aallartileraangata aatsaat aallartittaraluartut - ilinniartitaanerit allat atorluarneqarsinnaasut.

- Amerlasuutigut ulluinnarni sanaartornermi suliaqarnermi - aqqusinngiornermi, talittarfiliornermi, illuliornermi, assigisaallu aamma atorsinnaaqaat.

Aatsitassarsiortoqalissappat uuliasiortoqalissappaluunniit misilittakkat aallaavigalugit sulisoqarsinnaavoq. Pikkorissaanerit ilinniarnerit taamaalillutik annikinnerusumik imaluunniit annertunerusumik ingerlanneqarsinnaassallutik, Aatsitassaqarnermi Naalakkersuisoq, Jens Erik Kirkegaard oqarpoq.