Aatsitassanik misissuinerit aallarteruttorput, aningaasatigulli iluaqutaalernissaat sivisuvoq

Nunatsinni aatsitassarsiorneq aallarteruttorpoq.

Ujarlernerit misissuinerillu aatsaat taama amerlatigipput, siornamut sanilliutissagaanni aasaq manna aatsitassarsiorneq marloriaatinngorsimalluni.

Nunatsinni misissuinerit 35-it missaanniittut ingerlanneqarput, taakkunannga 15-t nutaajullutik.

Aatsitassat qaqugu nunatta aningaasaqarneranut iluaqutaalissanersut paasiniarparput.

-Nunatsinni misissuinissanut assigiinngitsunut akuersissutit nunatsinni sumiiffinni assigiinngitsuni inissisimapput. Soorlu Kangerlussuup kujataani massakkut diamantisiortoqarnissaanik misissuisoqartoq qillerisoqartorlu, Annette Jørgensen Aatsitassanut Ikummatissanullu Pisortaqarfimmi AC – fuldmægtig-iusoq oqarpoq.

-Guld-inut tunngatillugu Nalunami massakkut guld-isiortoqarpoq, selskabilu takanani guld-isiortoq suli guld-eqarfiusunik ujarlerpoq.

Nuup kangerluani Qeqertarsuarmi aamma guld-eqarpoq, tassani Nuna Mineral’s-i misissuivoq qillerinissamillu aamma pilersaaruteqarluni.

Annette Jørgensen-ip ilanngullugu oqaatigaa, tunumi akuersissutinik aamma nutaanik molybdæn-imut misissuinissamut tunniusseqqammerlutik, massakkullu qillerinissamut annertuumik pilersaaruteqartoqartoq. Molybdæn-i tassaavoq sisammut manngersaat.

Molybdæn-ili qaqugu nunatsinnut iluanaarutaalersinnaanersoq nalunartoq Annette Jørgensen-ip oqaatigaa.

-Siullermik qillerisoqassaaq, qillerneqarsimasut misissorluarneqaqqaassapput misissuinerlu ukiumut ingerlanneqareeruni upernaamut inerneri saqqummiunneqassapput. Inerneri saqqummiunneqareerpata aningaasiliisartui saaffigineqassapput, taakkulu nalilersussavaat piiaanissaq soqutiginerlugu. Soqutigissagunikkulu piiaanissamut akuersissummik aamma qinnuteqaqqaassapput.

-Assersuutigalugu ukiut qulit sinnerlugit Naluna-mi guld-eqartoq ilisimaneqarpoq, ukiullu qulit misissueqqaartoqarpoq, tamatumalu kingorna aatsaat piianissamik qinnuteqartoqarluni. Taamak sivisutigiuaannartariaqanngilaq, kisianni ukiut qulit aqqaneq marlulluunniit sivisutigisinnaavoq, Annette Jørgensen oqarpoq.

Selskabit 35-it misissuinissamik akuersissummik pinikut saniatigut, selskabit sisamat allat misissuinissaminnut qinnuteqaatitik akineqarnissaat utaqqivaat.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat