Taakkua saniatigut Aatsitassalerinermi Ilinniarfimmi ilinniartitisut aamma ilinniaqqinnissaat qulakkeerneqarpoq.Assi: Råstofskolen

USA Aatsitassalerinermik Ilinniarfimmut 7.5 millioninik aningaasaliisoq

Ilinniarfiup Sisimiuniittup ukiuni tullerni pingasuni aningaasaliiffigineqarnermini ilinniartuutai atungarissaarninngussasut, ilinniartitaanermut pisortaq oqarpoq.

Aningaasaliissutit ilinniarfimmut toqqaannartumik tussanngillat. Aatsitassalerinermilli Ilinniarfik USA-mi ilisimatusarfiit marluk atortorissaarutaannut nittartakkatigut toqqaannartumik attaveqalerpoq.

Nunarput USA-lu ukioq manna apriilip qaammataani 83 millionit koruunit nalinganut suleqatigiinnissamik isumaqatigiissusiorput.

Hans Hinrichsen

Aningaasanillu taakkunannga Aatsitassalerinermik Ilinniarfik 7.5 millionit koruuninik qulakkeerinnittoq, USA-p nunanut allanut ministereqarfia tusagassiuutinut nalunaarpoq.

Ilisimatusarfiit suleqatigineqassasut

Isumaqatigiissut malillugu University of Utah aamma University of Alaska Fairbanks ukiuni pingasuni suleqatigineqassapput.

Ilinniartitsinermi sakkut ilisimatusarfinni taakkunani marlunni atorneqartut Sisimiuni ilinniartunit atorneqarsinnaalerput, tamannalu ilinniartitaanermut pisortap, Hans Hinrichsenip, nuannaarutigaa.

AAMMA ATUARUK Nunarput USA-lu koruuninik millionilikkaanik nalilinnut suleqatigiissasut

- Taamaaliorneq Aatsitassalerinermut Ilinniarfimmut ajunngilluinnartuuvoq. Ukiuni tullerni pingasuni ikiorneqarnikkut, ukiunut qulinut siuariassasugut ilimagaara, Hans Hinrichsen KNR-imut oqarpoq, nangillunilu:

- Suliamut tunngasumik ilisimasaqarnerulerutta ilinniartugut aamma pikkorinnerulissapput, Aatsitassalerinermillu Ilinniarfimmi pitsaanerusumik ilinniartitsisinnaassalluta, Hans Hinrichsen oqarpoq.

Taakkua saniatigut Aatsitassalerinermi Ilinniarfimmi ilinniartitisut aamma ilinniaqqinnissaat qulakkeerneqarpoq.

USA-p sinniisaata tikeraarnerani aperigaa

Aningaasaliineq ilinniarfiup aatsitassalerineq pillugu anguniakkamik toraangaqarnerunissaanut aamma iluaqutaassasoq, ilinniartitaanermut pisortaq oqarpoq.

- Kalaallit Nunaani aatsitassalerinerinermi ukiuni tullerni pisoqangaatsiassaaq.

Isumaqatigiissullu aatsitassalerinermi kalaallinik sapinngisamik amerlanerpaanik ilinniartitsinissatsinnut iluaqutaassaaq, taamaalilluni nunani allaniit suliartortussarpassuusinnaagaluartut ikinnerusinnaanngortillugit, Hans Hinrichsen oqarpoq.

Aatsitassalerinermik iliniarfiup pisortaata, amerikamiut sinniisuat Sung Choi, Sisimiunut tikeraarnerani ataatsimeeqatigaa, aningaasaliinissarlu taanna piviusunngortinneqarpoq.

 

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat