Aatsitassalerinermik Ilinniarfimmi maskiinanik ingerlatsisutut ilinniartut allagartartaartut

Suliffeqarfinni assigiinngitsuni sulisussaaleqisoqarnera ullumikkut oqaluuserineqartorujussuuvoq. Aalisarnermi ilaatigut sulisussaaleqisoqarsinnaavoq, aatsitassalerinermilu sulisinnaasunik piukkunnarsaasoqanngippat, sulisussanik amigaateqartoqalersinnaalluni.
Allattoq Nutaarsiassaqartitsivik / Nyhedsredaktionen
decembarip 16-at 2013 05:42

Aatsitassalerinermik suliffeqarfinni siunissami sulisinnaasussat aqqaneq-marluk ilinniarnertik, Aatsitassalerinermik Ilinniarfimmi Sisimiuniittumi tallimanngormat naammaassivaat, sanaartornermi maskiinanik ingerlatsisutut ilinniarnertik naammassigamikku.

Aatsitassanik piianermi suliffeqarfimmi sulilissanersut, imaluunniit assersuutigalugu asfaltilerinermi cementimilluunniit assartuinermi aallaqqaammut sulilissanersut maanna apeqqutaaginnalerpoq.

Sanaartornermi maskiinanik ingerlatsisinnaanissamut pikkorissartut aqqaneq-marluk, Aatsitassalerinermik Ilinniarfiup pilluaqquai, sanaartornermilu maskiinanik ingerlatsisutut naammassinnissimasut katillutik maanna 120-nngorlutik. Ilinniagaq taanna nunani tamalaani atorneqarsinnaavoq, Norgemilu ataqatigiissumik aaqqissuussamut atatillugu akuerisaalluni.

Sanaartornermi maskiinanik ingerlatsisutut ilinniarneq kikkunnut tamanut soorunami ammavoq, atuagarsornertalimmik, suliffimmillu misiliinermik imaqarluni.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq