Aatsaat taama Kalaallit Nunaat allaaserineqartigigunarpoq
Cairn Energyp gassimik nassaarnera nunarsuatsinni tamani tusarneqarsimalereerpoq.
Ullulualunnguit ingerlaneranni Kalaallit Nunaat aviisini nutaarsiassaqartsitsivinnillu nunarsuarmit tamaneersunik 1000-it sinnerlugit allaaserineqareerpoq.
Aammattarli misiliilluni qillerinerit nunami issittumik ajoquseerujussuarsinnaaneri Greenpeacep assuarisaat tusagassiuutit arlallit allaaseraat, taakkununnga ilaallutik Tuluit TV-qarfiat BBC.
Aamma amerikami tusarliussanut ilaavoq gassimik nassaartoqarsimanera, soqutiginerusaalli BP-mut tunngalluni, tassami taakku pilersaaruteqarsimagamik issittumi uuliamik ujarleqataanissaminnut ammalu qinnuteqarnissaminnik pilersaarunarlutik.
Soqutigineqartut ilagaat Cairn Energyp pappiaraataaasa aningaasanik nalillit appariarneri, soorluttaaq Nunatsinni Naalakkersuisut siulittaasuat Kuupik Kleist issuarneqarsimasoq silatusaaqqusinerminik.
Financial Timesimi tyskisut saqqummersineqartartumi, Kuupik Kleist soqutigineqarluarluni allaaserineqarsimavoq. Aviisimi inuit pingaarutillit allaaserineqartarput. Financial Timersimi Kuupik Kleistip allaaserineqarnerani qulequtsiunneqarsimavoq: Sunaluunniit akigalugu. Tassani ilaatigut allassimavoq, Naalakkersuisut siuttorigaat nannutut ataqqinassusilik. Siulittaasuusoq assornissamik qunugisaqanngitsoq aammalu anguniagaqaraagami suut tamaasa atortarai.
