Aatsaat taama amerlatigisut qinnuteqarput
Taakkunanngali 187-it qinnuteqaatertik piffissaq eqqorlugu tunniutinngitsoorsimanerat pillugu imaluunniit qinnuteqaatit tamakkiisuunngitsumik immersorneqarsimanerat pillugu itigartitaanissaat ilimanarpoq.
Danmarkimi efterskolini atuartut 250-it atuarnissaannut tapiissuteqartoqarnissaa naatsorsuutigineqarpoq.
Maniitsumi efterskolemi atuartut 70-it akuerineqarput, taamaasillunilu atuartut 86-it itigartinneqanngikkunik utaqqisutut inissinneqarlutik. Villads Villadsenip Efterskoliani atuartut 86-it akuerineqarput, taamaasillunilu atuartut 63-it itigartinneqanngikkunik utaqqisutut inissinneqarlutik.
Tassa imaappoq, atuartut 406-it nunatsinni Danmarkimilu efterskoleni, Namminersorlutik Oqartussat tapiissuteqarnerisigut, atuarnissaminnut akuerineqarsinnaanngorput.
Illuatungaanili ajoraluartumik, nunatsinni Danmarkimilu efterskolini atuarnissamut qinnuteqartut 149-t, efterskolini marluusuni inissat killeqarneri pissutigalugu, uggornaraluartumik itigartinneqarput, Naalakkersuisoq Palle Christiansen oqarpoq.
Danmarkimi efterskolinut qinnuteqartut 38-t itigartinneqassapput, tamatumunnga peqqutaavoq aningaasanut inatsimmi aningaasaliissutigineqartut tunngavigalugit atuartut 250-it tapiissuteqarfiginissaat kisimi periarfissaammat, ukiunilu kingullerni allaffissornikkut sipaarniuteqartoqarnerata kinguneranik ilinniartitaanermi immikkut aningaasaliinissat ajornakusoornerat peqqutaaqataavoq.
Palle Christiansenilli erseqqissaatigaa atuartut itigartinneqartussat amerlanersaasa qinnuteqaatertik piffissaq eqqorlugu tunniutinngitsoorsimagaat imaluunniit qinnuteqaatertik tamakkiisumik immersorsimanngikkaat.
- Inuusuttut taamak amerlatigisut atuarnertik efterskolerlutik ingerlateqqinniaraat nuannaarnarpoq. Taamaattorli atuartunik neriuutilinnik meeqqat atuarfianni angusaminnik efterskolerlutik pitsanngorsaaniartunik itigartitsinissaq uggornarpoq, Palle Christiansen oqarpoq.
Nunatsinni efterskolit pilersinneqannginnerini Danmarkimi efterskolini atuarniartut tapiissuteqarfiginissannut qinnuteqartut 260-iniit 280-inut amerlassuseqartarput. Efterskoliugallartut atuutilersinneriniit aammalu efterskolit ataavartut atuutilersinneriniit efterskolernissamut soqutiginnillutik qinnuteqartartut marloriaataat sinnerlugit amerlisimapput.
---
Palle Christiansenip ilanngullugu oqaatigaa qinnuteqartut amerlassusaat aallaavigalugu nunatsinni efterskolit marluk pilersinneqarsinnaagaluartut, Danmarkimilu efterskolertarnermut aningaasaliissutit amerlineqarsinnaasut. Pissutilli tamakkua siunissami iliuuseqarfissatut salliutinneqassanersut naalakkersuinermik ingerlatalinnit oqallisigineqareerpata qanoq isummerfigineqassanersut takutikkumaarpaat, Palle Christiansen naggasiivoq.
