Aatsaat paasisaqarneq kanngunartuliorneruvoq

- Assorujussuaq kanngunartuliorneruvoq pakatsinarlunilu, Pituffiup eqqaani 1968-mi timmisartorsuup qaartartorsuutip nakkarnerata kingorna, ukiorpassuit qaangiutereersut aatsaat paasineqarmat nuna qinngornernik ulorianartunik aamma mingutsinneqarsimasoq. Taama oqarpoq Hingitaq 53-ip siulittaasua Uusaqqak Qujaukitsoq. Nakkarfiup nalaani immap naqqa kisiat pinnagu aammali nunataa ilanngullugu qangali misissuisoqarsimasinnaagaluartoq Uusaqqak Qujaukitsoq isumaqarpoq:

- Uanga assorujussuaq pakatsivunga, ukiorparpassuit qaangiuttut taamatut tusagaqaratta. Isumaqarpunga assorsuaq sakkortuumik soqutigittaattuliortoqarsimasoq. Massakkut saqqummiussap assiganik siornatigut tusarnikuunngisaannarpugut.

Avanersuarmiut ukiut ingerlaneranni maluginiagaqartarsimapput Uummannamit nuutsitaasut amerlasuut eqqumiitsunik peqqinnissakkut atugaqartarnerinik.

- Nakorsaannginnatta takussutissanik uppernarsaataasinnaasunilluunniit peqarsimanngilagut. Siornatigut paasitinneqarnikuunnginnatta taamaattoqarneranik.

- Kisianni inuit massakkut toqorareersut taamanikkut taavaniittartut nappaateqartarsimapput assorsuaq immaqa paasiniaaffigalugit paasineqarsinnaagaluartunik.

- Tassa kræfte immaqa annerpaamik nappaatigineqartarsimavoq, taava aamma ammikkut ammanersaqalertarneq taakaniittarsimasunit atugaasarsimavoq.

- Tassa qulannangiivissumik eqqoriaasinnaavugut tamakku mingutsitsinerup kingunerigai, Uusaqqak Qujaukitsoq oqarpoq.

Inuit pineqartut Uummannamiit nuutsitaareerlutik nunamik eqqaanut uteqqiattarsimapput.

- Tamanna pinngitsoorsinnaasimanngilaat, taajissuma eqqaata piniagassartai ilisimaaralugillu nalunnginnamikkit.

Uusaqqak Qujaukitsoq erseqqissaavoq timmisartorsuup nakkarnera siornagut inuit taama eqqumiittsunik nappaateqakulasarsimanerinik eqqaamasaqarani.

- Naamerluinnaq, Inuit immaqa silarsuarmi peqqinnerpaat utoqqarsuanngorlutik toqusarnikuupput tamatuma siornatigut.

- Kisianni ukiut pisoqarfiit kingunerisigut 1970-kkunni 1990-kkunni tamakkua utoqqaat toqusarsimasut assigiipajaamik peqquteqarlutik toqusarnikuupput kræfti annerusumik nappaatigalugu. Taavalu ajoquteqartitertarlutik immikkut uagut paasisinnaanngisatsinnik.

Iliuuseqartoqartariaqartoq Uusaqqak Qujaukitsoq isumaqarpoq.

- Eqqarsaatigivara allaat qanoq iliuuseqartoqassanngippat immaqa ukiup affaata ingerlanerani taava maanimioqatikka Hingitaminngaanniit oqaloqatigerusuppakka. Arlaatigut iliuuseqarnissarput aalajangiuttariaqassavarput pinngitsoorata.

Maannamiit ukiup affaaqangiuppat qallunaat kalaallit amerikamiulluunniit tungaanniit iliuusissanik aallartitsisoqanngippat, taava suliamik eqqartuussivinnut ingerlatitseqqissinnaanissartik aamma periarfissaasoq Uusaqqak Qujaukitsoq erseqqissaavoq. Danmarkimi Risøp ilisimatusarfiata saqqummiuteqqammerpaa nalunaarusiaq Qaanaap eqqaani nunap plutoniummimik mingutsinneqarsimaneranut uppernarsaasoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat