Aalisartoq piniartorlu Ilulissaneersoq Nielseeraq Magnussen ippassaq Ilulissat eqqaanni aataamik marlulissanik illaalimmik pisaqarpoq, tamannalu qaqutigoortorujussuulluni.
- Puisini marlulissat assorsuaq qaqutigoortuupput. Qanorpiaq akulikitsigisumik tamanna pisarnersoq ilisimaneqanngilaq, Pinngortitaleriffimmi puisit pillugit immikkut paasisimasalik Aqqalu Rosing-Asvid oqarpoq.
Pinngortitaleriffimmi ilisimatusartunit natsiit marlulissanik piaqqisut ukiumut ataasiaannangajallutik tusarneqartarput, aataalli marlulisarnerat qaqutigoortorujussuuvoq.
- Tamatumunnga pissutaasut ilagaat aataat piaqqaminnik uumatitsiniarnerminut inuussutissarujussuarmik tunisisarnerat, Aqqalu Rosing-Asvid oqarpoq.
Aataavaqqat ulluni quliniit aqqaneq-marlunnut miluttarput ullormullu 2,5 kiilut missaannik oqimaalleriartarlutik. Natsialli ulluni 35-ni miluttarput ullormullu 350 grammit missaannik oqimaallisarlutik.
- Aamma aataat piaqqaminnut marlunnut inuussutissaqartitsiniarnissartik suli ajornartorsiutiginerujussuussagaat Aqqalu Rosing-Asvid oqarpoq.