Aasuiaa alutorsaatigineqaqaaq
Aasuiaa - Kalaallit Nunaata issittormiunut ICC-p ataatsimeersuarneranut peqataajartortunut tunissutigaa, taama Nunat avannarliit siunnersuisoqatigiiffiata NAPA-p ippassaq pisoq nalilerpaa.
Takutitaq qilaatersornermiit ullutsinni nipilersoriaatsimut imaqarpoq.
Jazz, opera, klassisk, blues, kalattuut, rock aamma erinarsoqatigiit atorluarlugit Hans Peter Kleemann nipilersugassiorsimavoq Aasuiaa-mik siullermeerluni ippassaq tusartinneqartumik taasimasaminik.
Nuummi illorsuaq Timersortarfik naggueqatigiinnik inunnik Alaskamiit, Nunavumiit Tjukotkamiit maanngaanneersuneersunillu ulikkaarluinnarsimavoq.
- Nuannaaqaanga. Siorna ukiakkut unnuaanerani KNR-radio tusarnaarujoorlugu Hans A. Hansenip aallakaatitassiaa tiguartiffigaara. Laarseeraq Svendsenip erinarsugaa Aasuiaa qarasanni peersinnaanani periarfissanik eqqarsalersitsivoq, Hans Pater Kleemann oqaluttuarluni aallartippoq.
Nipilersortartoq siulleq aperisani tassaagunarporooq agiartartoq Hanne Qvist.
- Nutaaliornissamut ammavoq, taama aamma pivoq pattattartoq Jim Milne. Nipilersugassiaq piareersarlugu naammassiartortillugu suliaq annerujartorpoq, peqataasussallu amerlangaalermata iluatsissanersoq pissangagilersimagaluarpara. Kisianni suna tamarmi iluatseqaaq, Hans Peter Kleemann Aasuiaamik taallugu tusarnaagassiornissamik isumassarsisoq oqarpoq.
Aasuiaami Laarseeraq Svendsenip erinarsuusiai "Aasuiaa" aamma "Illunnguanigooq Qivittorsuaq" atorneqarput.
Agiartartoq Hanne Qvist aamma nutsugiartartoq Leif Immanuelsen nipilersornerup annersaani peqataasuupput.
Leif Immanuelsen aamma taannaavoq qilaatersorluni tivanermik takutitsisoq. Angutit erinarsoqatigiit Qissiat alutornarluinnartumik aamma tusarnaartitsipput, taannaannaasoriniarlugu kinguninngua rockimik jazzimillu nipilersullammaat piginnaanitik tusartittalerpaat, soorlu tassa timersortarfiup qaliaa qangattaannassasoq.
Hans Peter Kleemann nammineq ukiorpassuarni nipilersortartuusoq allallu nipilersornerannik soqutiginnittuusoq Aasuiaami kikkut sussanersut tamaasa aaqqissorsimavai. Nammineq naggataani guitarerluni peqataavoq, Pamyuakkut erinarsortuat Karina Møller aamma Naalakkersuisut siulittaasuat Kuupik Kleist alutornaqisumik ingialloramigit.
- Nipilersoreeratta nuannarinnittorpassuupput pilluaqqusisorpassuullutillu. Good job, torrak, pilluaritsi, sumit tamaannga tusarsaavoq. Mobilinni SMS-isiassakka pilluaqqussutit 23-it aamma utaqqipput. Kikkut tamarmik nuannaraat. Tuppallernaqaaq, Hans Peter Kleemann oqaluttuarpoq.
Hans Peter Kleemann nunatsinni nipilersortartut kajumissaarusuppai, nipilersoriaatsinik allanik, sungiusimasaminnit allaanerusunik, aamma misiligaasaqqullugit.
- Ippassaq takutipparput kalaallit nipilersullaqqissorsuusut, sapinngilagut, oqarpoq.
Aasuiaap saqqummersinneqarsinnaanera kissaatigisinnaagaluarpaa, kisianni ajornakusoornissaa akisunissaalu ilimagilereerlugu.
NAPA Aasuiaa-p takuteqqaarneqarneranut aningaasaleeqataavoq.
