Aasivik toqqissisimanartuussaaq

Nuummi Aasivilerisut ilaatigut oqariartuutigaat Aasivik imigassartaqanngitsumik aanngajaarniutitaqanngitsumillu ingerlanneqartassasoq. Tassunga pissutaasut ilagaat ilaqutariit toqqisisimallutik, peqataallutik, eqeersimaarlutik oqalliseqatigiittarnissaat, pissarsiffiunerussammat.

Imigassamik aanngajaarniutinillu atuisoqannginnissaanut oqariartuut, peqataasunit ataqqineqassasoq Per Rosing-Petersenip upperaa.

- Aasiviup siunertaraa imminut ikorfartoqatigiinnissaq. Taamaammat oqariartorneq imminullu piumaffigineq naammattariaqarpoq, Per Rosing Petersen oqarpoq.

- Pingaartippara paseqattaattoqannginnissaa, peqataasullu oqariartuummut ataqqinninnissaat tatigaara, Per Rosing-Petersen KNR.gl-mut oqarpoq.

Aasivittartutoqqat ilaat, ilaatigut Tunumi Nunattalu isuata eqqaani peqataasimasup, Magga Karlsenip Aasivik toqqissisimanartutut susassareqatigiiffittullu eqqaamasaqarfigaa.

- Aasivimmi eqqissiivilluni inuulluni, ullaakkut imertaqatigiittarnerit, silameerujoortarnerit, meeqqallu pinnguarujoortarneri nuannertaqaat, Magga Karlsen KNR-gl-imut oqarpoq.

- Qamuuna nuannaarutigingaarpara Aasivik pilerseqqinneqarmat. Nunatsinnit tamaneersunut ataatsimoorfissaavoq pissarsifiusarpoq. Nipit, erinnat oqariartuutillu allat tusarlugit nuannertaqaaq, Magga Karlsen nuannaarpaloqaluni naggasiivoq.