Aasivik naalerpoq

Ukiuni 16-ini Aasiveqanngereersoq Aasiveqaqqittoqarnera aaqqissuisunit nuannaarutigineqarpoq. Aaqqissuisut ilaat, Karsten Heilmann tulluusimaaqisoq, KNR-imit oqaloqatigaarput.

- Aasiviup aallarteqqinnera nuannerpoq. Inuppassuit maannga takkussuupput, malunnarporlu tamarmik nuannaarutigalugu peqataaffigigaat, tamannalu assut uangutsinnut tulluusimaarnarpoq, Karsten Heilmann oqarpoq.

Qangaaniilli Aasiveqartarnerni tammaarsimaartut Nunatsinni pissutsit pillugit oqallittarput, ukioq mannalu Aasiveqarnerani aamma taamaattoqarluni. Oqallisigineqarluartut ilaat Karsten Heilmann-ip maluginiarsimavaa.

- Oqallisigisagut arlaliupput. Oqarsinnaanngikkaluarpunga oqallisaasut ilaat allanit pingaarnerusut kisianni oqallisaasoq ataaseq maluginiarpara, tassalu kinaassutsimut tunngasoq oqallisigineqarmat oqallinneq uummaarittumik ingerlanneqarpoq.

Oqallisigisat arlaqartut najoqqutaralugit Aasivilerisut nalunaarusiortussaasut Karsten Heilmannip ilanngullugu oqaatigaa.

- Oqallisaasut arlallit inernilerneqarneri unnummut ataatsimiissutigineqassaaq, naatsorsuutigaaralu ulluni qaninnerni inerniliussaq tamanut saqqummiunneqarumaartoq.

Karsten Heilmannip neriuutigaa oqallisaasut kinguneqarluarumaartut.

Ukiut 16-it Aasiveqanngereersoq ukioq manna Aasivik ullumi naammasineqarpoq. Karsten Heilmannillu naatsorsuutigaa aappaagu Aasiveqaqqittoqarumaartoq.

- Ullumikkut aalajangerneqassaaq Aasivik ingerlaqqissanersoq. Imaassinnaavoq aappaagu Nuup eqqaani aamma Aasivik ingerlanneqaqqittoq.

Aasivik 2012-mik aaqqissueqataasoq, Karsten Heilmann taama oqarpoq.